VOV4.Êđê- Hluê si klei hưn mơ̆ng anôk bruă ksiêm dlăng klei ruă tưp čar Dak Lak, hlăm čar mrâo lŏ mâo sa čô djiê kyua klei ruă tưp Covid-19. Anei jing pô djiê tal 273 kyua klei ruă tưp Covid-19 ti alŭ wăl čar. Pô ruă k’kiêng thŭn 1947, dôk ti alŭ 4, să Hòa Tân, kdriêk Krông Bông. Êlâo kơnăn, hruê 25/9, pô ruă mâo klei êmăn hlăm asei mlei, êngoh hlơr, nao mkă dlăng ti anôk bruă mdrao mgŭn kdriêk Krông Bông, êjai mdrao mgŭn amâo mâo klei hrŏ, kyuanăn dưi ba mdrao ti sang êa drao prŏng krĭng Lăn Dăp Kngư.

Ti nei dưi Test pral Covid 19 leh anăn boh tŭ ƀuh mâo kman SARS-CoV-2. Ăt hlăm hruê, mnuih ruă anei dưi ba ti anôk mdrao klei ruă tưp Covid-19 sang êa drao prŏng krĭng Lăn Dăp Kngư. Leh 5 hruê dŏng mdrao, kyua thŭn khua leh anăn mâo lu mta klei ruă êlao msĕ si: ruă boh ƀleh, ruă êlan aruăt êrah, hnơ̆ng êrah đĭ, mâo mta mmih hlăm êrah type 2, pô ruă anei djiê ti mmăt hruê 30/9. Năng mđing, pô ruă anei ka tlŏ mgang ôh vaccine gang mkhư̆ klei ruă tưp Covid-19./.

Pô mblang: Y-Ƀel Êban