VOV4.Êđê - Hlue si klei ksiêm yap mơ̆ng Anôk bruă ktuê dlăng klei ruă čar Dak Lak, mơ̆ng akŏ thŭn truh hruê 31/7, Dak Lak mâo 2.451 čô êngoh bi ƀlĕ êrah, đĭ 5,1 blư̆ mkă hŏng wưng anei thŭn 2021, mâo 1 čô mnuih djiê. Hlăm anăn, kdriêk Ea Sup mâo ênoh mnuih ruă lu hĭn hŏng 297 čô, leh anăn kdriêk Krông Pač hŏng 267 čô, ƀuôn prŏng Ƀuôn Ama Thuôt 258 čô leh anăn kdriêk Buôn Đôn 214 čô.

Ară anei 15 kdriêk, wăl krah, ƀuôn prŏng ƀuh leh 140 anôk mâo klei ruă êngoh bi ƀlĕ êrah. Êpul bruă mdrao mgŭn krih leh êa drao, bi doh wăl hdĭp mda. Bruă mdrao mgŭn đăo knăl klei ruă êngoh bi ƀlĕ êrah srăng mâo lu hĭn hlăm mlan 8/2022. Ngô Thị Minh Trinh, K’iăng Khua Knơ̆ng bruă sang čư̆ êa kdriêk Krông Pač brei thâo: Kdriêk gĭt gai leh êpul mdrao mgŭn leh anăn dŭm alŭ wăl iêô jak mnuih ƀuôn sang msĕ si: pĭt kă mŭng, mdjiê hluăt lŏk, bi doh wăl hdĭp mda čiăng mkhư̆ klei ruă tưp lar.

H’ Zawut  pô mblang