VOV4.Êđê - Hluê si Anôk bruă ksiêm dlăng klei ruă tưp CDC Dak Lak, hruê 7/6, ti alŭ wăl čar mâo 1 čô djŏ klei ruă Whitmore ti alŭ Chiềng, să Êa Lôp, kdriêk Êa Sup. Pô ruă anei jing N.T.V (Mniê, kkiêng thŭn 2013, dôk ti alŭ Chiềng, să Êa Lôp, kdriêk Êa Sup). Hruê 4/6, pô ruă anei nao ksiêm mkă dlăng klei ruă ti Sang êa drao prŏng krĭng lăn dap kngư, mŭt mdrao ti adŭ mdrao klei ruă kluôm kơ phung hđeh hlăk dôk êngoh 39 độ C, ti tluôn dua nah knga bŏk, khăp amâo thâo kpư̆ mgei. Amâo mŭt huă ƀơ̆ng. Truh hruê 7/6, pô ruă anei êngoh truh 41 độ C.

Ksiêm mkă dlăng mâo boh tŭ bi mklă djŏ kman klei ruă Whitmore. Leh mâo klei hưn sa čô ruă Whitmore, CDC Dak Lak pral hưn mthâo kơ anôk bruă djŏ tuôm, mbĭt anăn mkŏ mjing hdră ksiêm dlăng ti êpul êya kñăm gang mkhư̆ klei ruă đĭ lar. Klei ruă Whitmore jing sa klei ruă tưp dưi mtưp kơ pô mkăn lehanăn mnơ̆ng rông. Mta phŭn ngă klei ruă anei kyua kman klei ruă anei mâo hlăm êa lehanăn lăn čhŏ djhan. Klei ruă anei kreh ngă djiê mnuih kyua bi jhat ksŏ, êrah, bi awăt jih asei mlei tơdah amâo dưi mdrao pral, djŏ hdră. Mta kman anei dưi bi kdơ̆ng hŏng lu mta kháng sinh, hlăk ai bi kdơ̆ng mơ̆ng asei mlei amâo dưi mdrơ̆ng tŭ dưn ôh hŏng mta kman anei.

Ti Việt Nam, mnuih ruă Witmore dưi čih yap tal êlâo hlăm thŭn 1925, leh kơnăn mâo ti dŭm alŭ wăl hlăm kluôm ala lehanăn đĭ hlăm wưng giăm anei. Ti Dak Lak, anei jing mnuih ruă tal êlâo dưi hmao ƀuh./.

H’ Nêč pô mblang