VOV4.Êđê- Hlăm dŭm hruê giăm anei, dŭm sang êa drao ti čar Dak lak mâo nanao hđeh nao ksiêm mkă leh anăn đih mdrao ti sang êa drao kyua mâo klei ruă jơ̆ng kngan ƀăng êgei. Năng mđing, lu phung hđeh mâo klei ruă jơ̆ng kngan ƀăng êgei ƀiădah amĭ ama amâo thâo, tơl nao đih ti sang êa drao hđeh ruă kjham leh.

Dlăng kriê anak êbeh 10 mlan mâo klei ruă jơ̆ng kngan ƀăng êgei dôk mdrao ti Sang êa drao prŏng krĭng Lăn dap kngư, Vũ Thị Hương ti kdriêk Krông Pač, čar Dak Lak brei thâo, 1 hruê kăm êlâo, gŏ sang ñu ƀuh ĕ mâo klei bi êdah êngoh, hia, bi kdĭt asăr tu plă kngan kyua anăn ba ĕ kơ anôk bruă mdrao mgŭn kdriêk dŏng mdrao. Leh 2 hruê đih mdrao ti sang êa drao kdriêk, ĕ amâo dul ôh kyua anăn gŏ sang ba nao kơ sang êa drao prŏng krĭng lăn dap kngư dŏng mdrao.

0                         

“Êlâo adih dlăng tivi, aê mdrao lačư klei ruă anei huĭ hyưt mơh ƀuh snăn hmei ba nao ti sang êa drao. Phung amĭ ƀuh anak pô êngoh ba nao ti sang êa drao yơh lui snăn ti sang huĭ hyưt snăk”.

Aê mdrao Sang êa drao krĭng Lăn Dap Kngư dôk ksiêm mkă kơ hđeh mâo klei ruă jơ̆ng kngan ƀăng êgei

          Ăt dôk dlăng kriê anak ti adŭ mdrao hđeh điêt Sang êa drao prŏng krĭng lăn dap kngư, amai Nguyễn Thị Thanh Thảo ti kdriêk Čư̆ Kuiñ, čar Dak Lak brei thâo, amai ka jih mơh klei huĭ hyưt hlăk dŭm hruê êgao ƀuh anak ñu bi kñhăk nanao kyua mâo klei ruă jơ̆ng kngan ƀăng êgei.

        “7h aguah aê mdrao nao ksiêm mkă dlăng leh kbiă ti tač ĕ hlŏng bi kñhăk, hlăm brô 10 mnĭt jih yơh, truh 2h tlam lŏ bi kñăk sa blư̆ dơ̆ng mơh, 10 mnĭt jih hĕ lehanăn amâo lŏ hdơr êa êpa êsei 30 mnĭt, hruê anăn yơh kjham hĭn. Kâo ƀuh huĭ hyưt êdi yơh, pral đei amâo lŏ thâo bĭt mjing.

\        Aê mdrao Trần Thị Thúy Minh, Khua adŭ mdrao hđeh Sang êa drao prŏng krĭng lăn dap kngư brei thâo, ară anei sang êa drao dôk mdrao lu phung hđeh mâo klei ruă jơ̆ng kngan ƀăng êgei, knŏng tĭng hlăm 1 hruê kăm giăm anei, adŭ mdrao leh kơ 10 čô ruă. Hluê si aê mdrao Minh, klei ruă jơ̆ng kngan ƀăng êgei kreh mâo ti phung hđeh gŭ 5 thŭn, boh nik gŭ 3 thŭn. Klei ruă anei ênưih tưp. Phung hđeh djŏ kman anei hlăk bi mjĕ, sô̆ hŏng êa dŭng, êa bah, ƀăng êgei mơ̆ng mnuih ruă amâo dah dŭm mta mnơ̆ng đuôm kman anei msĕ si jhưng mdhô̆, mnơ̆ng hlăp lêñ…

Rao kngan srăng jing hdră tŭ dưn đru kơ hđeh mkhư̆ klei ruă jơ̆ng kngan ƀăng êgei

        Leh djŏ klei ruă, hđeh kreh mâo klei bi êdah msĕ si, ruă đŏk, mƀlĕ, bi kdĭt buk êa ti kngan, jơ̆ng amâo dah tluôn. Hŏng hđeh ruă hdjul, klei ruă dưi hlao dŭm hruê. Khă snăn, mâo hđeh ruă ktrŏ, amâo pral dưi dŏng mdrao, huĭ srăng hmăi truh kơ kŏ dlô lehanăn mâo dŭm klei truh amâo jăk kơ hđeh.

“Klei ruă anei mâo klei bi êdah mdê mdê lehanăn tui hluê ktrŏ amâo dah hdjul drei ba dŏng mdrao. Snăn di amĭ ama brei mđing dlăng kơ anak čô pô tơdah mâo klei bi êdah êngoh, mâo klei mđuč êa, êka ti kngan, ti ƀăng êgei snăn ba nao kơ anôk bruă mdrao mgŭn giăm hĭn čiăng ksiêm mkă dlăng, mdrao mdrao”.

        Ăt hluê si Aê mdrao Trần Thị Thúy Minh, klei ruă jơ̆ng kngan ƀăng êgei jing klei ruă tưp huĭ hyưt, ka mâo vaccine gang mkhư̆. Hdră gang mkhư̆ phŭn jing dlăng kriê klei suaih pral, bi mdoh nanao asei mlei hđeh msĕ si rao nanao kngan hŏng kƀu, bi mdoh mnơ̆ng dhơ̆ng, mnơ̆ng hlăp lêñ hŏng êa rao bi mdjiê kma. Hŏng hđeh mâo klei ruă jơ̆ng kngan ƀăng êgei hdjul, dưi dlăng kriê lehană mdrao ti sang. Khă snăn, amĭ ama lehanăn mnuih dlăng kriê brei tui ksiêm nanao tơdah hđeh mâo klei bi êdag ktrŏ brei ba mtam kơ anôk bruă mdrao mgŭn giăm hĭn čiăng ksiêm mkă dlăng lehanăn dŏng mdrao./.

                                                    Pô mblang: H’Nêč Êñuôl