Hluê si klei tĭng mkă mơ̆ng anôk bruă rông mnơ̆ng leh anăn kơ mnơ̆ng rông čar Dak Lak brei ƀuh, hlăm čar ară anei mâo hlăm brô 180.000 drei asâo, miêo jing mnơ̆ng rông hlăm gŏ sang. Mơ̆ng akŏ thŭn truh kơ ară anei, hlăm čar mâo 2 čô djiê kyua asâo khŏ kĕ, dŭm pluh čô mkăn hmao tlŏ mgang.

Anôk bruă djŏ tuôm hmao ƀuh, čuh rai dŭm pluh drei asâo khŏ. Hlăm brô 64.000 drei asâo, miêo dưi tlŏ mgang vaccine klei ruă khŏ. Trần Ngọc Sơn, k’iăng khua kiă kriê anôk bruă rông mnơ̆ng leh anăn mdrao kơ mnơ̆ng rông čar Dak Lak brei thâo, ară anei mbĭt hŏng bruă mđĭ ktang bruă tlŏ mgang vaccine kơ asâo miêo, dhar bruă mdrao kơ mnơ̆ng rông lŏ bi mguôp hŏng dŭm alŭ wăl hâo hưn čiăng kơ mnuih ƀuôn sang mđĭ klei thâo săng, čŏng pô gang mkhư̆ klei ruă khŏ, ngă bruă krư̆ hĕ mnơ̆ng rông.