VOV4.Êđê - Čar Dak Lak dôk mtrŭt mđĭ hdră tlŏ vaccine gang mkhư̆ Covid 19 aruăt lŏ mñă wĭt truh kơ grăp să, ƀuôn hgŭm, hŏng hdră nao truh ti djăp anôk, khŏk ƀăng djăp sang, ksiêm dlăng djăp mnuih čiăng tlŏ kơ mnuih ƀuôn sang. Hluê anăn, mơ̆ng anei truh kơ jih mlan 6 anei, Dak Lak gĭr tlŏ jih 260 êbâo hnơ̆ng vaccine gang mkhư̆ Covid 19 mâo mkăp brei. Ênoh vaccine anei dưi ba yua čiăng tlŏ aruăt tal 3, 4 kơ mnuih mơ̆ng 18 thŭn kơ dlông, hŏng mta kñăm êbeh 95% ênoh mnuih mơ̆ng 18 thŭn kơ dlông dưi tlŏ aruăt tal 3, lehanăn tlŏ kơ mnuih ba anăp hlăm hdră gang mkhư̆ klei ruă, mnuih mâo klei ruă mơ̆ng êlâo brei tlŏ aruăt tal 4.

Hluê si Anôk bruă ksiêm dlăng klei ruă tưp čar Dak Lak, ară anei hnơ̆ng luôm vaccine gang mkhư̆ Covid 19 aruăt tal 3 ti alŭ wăl mâo êbeh 32%, aruăt tal 4 mâo 1.5%. Anei jing mrô ƀiă êdi mkă hŏng klei kčah mtrŭn mơ̆ng Phŭn bruă mdrao mgŭn Hoàng Hải Phúc, K’iăng khua Anôk bruă ksiêm dlăng klei ruă tưp čar Dak Lak brei thâo, čiăng kơ hdră tlŏ vaccine gang mkhư̆ Covid 19 dưi ngă djŏ wưng kčah, êpul đru kčĕ kơ knơ̆ng bruă mdrao mgŭn jao ênoh čuăn klă klơ̆ng kơ 15 kdriêk, wăl krah, ƀuôn prŏng, hlăm anăn mtă kơ dŭm alŭ wăl brei nao truh ti djăp anôk, khŏk ƀăng djăp sang, ksiêm dlăng djăp mnuih čiăng tlŏ kơ mnuih ƀuôn sang: “Hmei jao ênoh čuăn čiăng kơ gưl kdriêk đru kčĕ kơ anôk bruă sang čư̆ êa kdriêk ba mdah hdră msir ktang hĭn hŏng alŭ wăl, anôk bruă bi hluê ngă. Hmei kah mbha vaccine, ti alŭ wăl amâo tŭ mă snăn Anôk gĭt gai kdriêk anăn ƀuăn rơ̆ng hŏng anôk bruă sang čư̆ êa kdriêk tơdah lui alŭ wăl bluh mâo klei ruă brei tŭ klei đua klam. Hmei hluê ngă hdră mtô mblang ti kdrăp hâo hưn kơ mnuih ƀubn sang, si bĕ hâo hưn čiăng kơ mnuih ƀuôn sang thâo săng kơ dŭm hdră êlan mtrŭn mơ̆ng Đảng, mơ̆ng knŭk kna lehanăn klei tŭ dưi mơ̆ng mnuih ƀuôn sang jing nao tlŏ vaccine kyua anei jing vaccine gang mkhư̆ COVID-19.”

H’Nêč pô mblang