Jing sang êa drao gưl knhal tuič mơ̆ng čar lehanăn krĭng wăl, phung khua Sang êa drao prŏng krĭng Lăn dap kngư gĭt gai leh dŭm adŭ mdrao, adŭ bruă kah mbha mnuih mă bruă, kdrăp mnơ̆ng, êa drao gŭn… kơ hdră ksiêm mkă dlăng, mdrao klei ruă hlăm wưng Têt Nguyên đán 2023. Hluê Nguyễn Đại Phong, Khua sang êa drao prŏng krĭng Lăn dap kngư, sang êa drao mbha leh êpul dôk gak, mă bruă jih hruê mlam 24/24, ti 4 gưl, mâo: Phung khua, phung thơ̆ng hdră mdrao, anôk bruă ngă hră m’ar lehanăn phung mă bruă răng mgang; dŭm hdră msir bi hrŏ klei lu đei mnuih ruă nao mdrao mâo leh Sang êa drao pŏk ngă: “Kơ mnuih mă bruă hmei mtă kơ phung aê mdrao lehanăn jih jang mnuih mă bruă hlăm wưng Têt amâo dưi mdei lehanăn phung khua dŭm adŭ mdrao bi mlih tuôr gak răng. Tơdah mâo klei truh amâo jăk, ƀơ̆ng djŏ mnơ̆ng ruă hmei srăng brei jih jang mnuih mă bruă ti adŭ mdrao mjêč nao dŏng mdrao, êa drao gŭn mprăp djăp leh. Bi kơ êrah hlăm wưng Têt hmei prê leh hlăm brô 20 êbâo mrô êrah doh mkăp kơ hdră mdrao wưng Têt.

Mbĭt anăn, Sang êa drao lŏ mđing kơ hdră mdrao mnuih ruă, mnuih mâo klei truh hlăm êlan klông, ƀơ̆ng djŏ mnơ̆ng ruă... hlăm dŭm hruê Têt. Mđing mprăp djăp êa drao gŭn, gang mkhư̆ klei ruă tưp, boh nik Covid 19. Mbĭt anăn, mprăp jăk hdră hdră ba dŏng mdrao gưl dlông. Mkŏ mjing kjăp hdră kah mbha, bi mklă, bi ktlah klei tưp klei ruă hlăm sang êa drao hŏng ai tiê pral kdal. Aê mdrao thơ̆ng kơ adŭ mdrao 2 Trịnh Hồng Nhựt, K’iăng khua sang êa drao, Khua adŭ mdrao mjêč lŏ krŭ wĭt klei suaih pral Sang êa drao prŏng krĭng Lăn dap kngư brei thâo: “Hlăm wưng Têt mâo lu êdi mnuih ruă. Ăt ƀrô mơh mnuih mă bruă mâo lu, wăt aê mdrao, phung mdrao mgŭn bi tuôr mă bruă rơ̆ng hdră mă bruă hlăm wưng Têt ăt msĕ mơh mprăp kơ hdră gang mkhư̆ klei ruă Covid 19 lehanăn dŭm klei ruă mkăn huĭ bluh mâo.

Hluê Nay Phi La, Khua knơ̆ng bruă mdrao mgŭn Dak Lak, kluôm čar ară anei mâo êbeh 200 anôk ksiêm mkă dlăng klei ruă. Čiăng rơ̆ng klei suaih pral wưng Têt djuê ana, Anôk bruă čih mkra leh hdră mđĭ klei mă bruă čiăng rơ̆ng mnuih ƀuôn sang dưi drông Têt êđăp ênang, mbha mnuih mă bruă jih hruê mlam hdŏng phung khua kiă kriê rơ̆ng klei kreh knhâo, tŭ dưn; mâo hdră mkăp djăp êa drao gŭn, êrah, hoá chất, ôxy, jhưng đih, hdră dŏng mdrao boh nik klei truh hlăm êlan klông, mtuh phao, êka êkeh, ƀơ̆ng djŏ mnơ̆ng ruă lehanăn mdrao mnuih mâo klei ruă tưp hlăm wưng Têt. “Dŭm êpul mkăp djăp kdrăp mnơ̆ng kñăm gang mkhư̆ klei ruă tưp ăt msĕ mơh klei doh êƀăt mnơ̆ng dhơ̆ng lehanăn mprăp mdrơ̆ng hŏng djăp klei mâo. Tinei, mnuih mă bruă mâo leh, anôk bruă mdrao mgŭn ăt mtă kơ anôk bruă êngao knŭk kna ti alŭ wăl hgŭm mbĭt. Hŏng gŏ sang mnuih ruă êngao klei đru mơ̆ng knŭk kna hmei ăt iêu mtrŭt klei đru mơ̆ng êpul bruă đru kơ mnuih knap mñai đru kơ mnuih ruă.

Khua phŭn bruă mdrao mgŭn ăt ba mdah Asăp mtrŭn mtă kơ dŭm anôk bruă mđĭ hdră mdrao mgŭn rơ̆ng wưng drông Têt djuê ana Quý Mão 2023 m’ak, êđăp ênang. Klă klơ̆ng, Khua phŭn bruă mtrŭn asăp dŭm anôk bruă hlăm knơ̆ng bruă mdrao mgŭn, khua anôk bruă mdrao mgŭn dŭm čar, ƀuôn prŏng, êpul êya mđing čih mkra hdră kčah mă bruă, mbha mnuih mă bruă jih hruê mlam hŏng phung khua kiă kriê, mnuih mă bruă rơ̆ng klei kreh knhâo, tŭ dưn, hưn mthâo klă grăp hruê hruê djŏ si klei kčah mtrŭn.

Mbĭt anăn, amâo dưi ngă ngơi, amâo mđing răng anăp klei ruă tưp; mkŏ mjing, mkăp êpul, kdrăp mnơ̆ng gak răng, ksiêm dlăng klei mâo lehanăn msir mghaih klei amâo jăk, rơ̆ng klei êđăp ênang, rơ̆ng klei hâo hưn klă mngač, mkăp kơ mnuih ƀuôn sang lehanăn anôk bruă duh mkra, boh nik ti anôk ksiêm mkă dlăng, mdrao klei ruă, hluê ngă jăk hdră dlăng kriê, mđĭ ai mnơ̆ng dhơ̆ng, ai tiê klei mĭn hŏng êpul knuă druh, mnuih mă bruă mdrao mgŭn ti alŭ wăl./.