VOV4.Êđê- Leh hmư̆ hing mâo mta mlih mrâo kman BA.4 lehanăn BA.5 ti Việt Nam hŏng ênoh tưp lar pral hĭn dŭm mta kman êlâo, mơ̆ng hrue 7/7-31/7 čar Daklak srăng lŏ tŭ mă êbeh 100 êbâo hnơ̆ng vaccine gang mkhư̆ klei ruă tưp Covid 19 gưl 25, pioh tlŏ mgang ênŭm kơ phung ƀuôn sang. Hŏng ênoh 110 êbâo 100 hnơ̆ng vaccine gưl anei, Daklak srăng tlŏ djăp ênoh čuăn mơ̆ng 12 thŭn kơ dlông ti aruăt lŏ mñă êbeh 90%. Êpul hđeh mơ̆ng 5 - 11 thŭn mâo tlŏ mgang êbeh 90%.

Čiăng kơ gưl tlŏ mgang tal anei djăp ênoh čuăn, anôk bruă kiă kriê klei ruă čar Daklak kčĕ leh kơ knơ̆ng bruă sang čư̆ êa čar lehanăn knơ̆ng bruă mdrao mgŭn đru kčĕ hĭn čiăng kơ jih jang bruă kđi čar mơ̆ng čar kdriêk truh kơ să hrăm mbĭt ngă bruă hâo hưn kơ phung ƀuôn sang, čiăng kơ phung ƀuôn sang thâo săng klei tŭ dưn bruă tlŏ mgang, lehanăn jing bruă klam mơ̆ng grăp čô mnuih./.

Pô mblang: Y-Khem Niê