Êlâo anăn, hrue 18/4, ti sang hră mâo 8 čô hđeh mâo klei ruă hŏng kman SARS-CoV-2. Mơ̆ng anăn dhar bruă mdrao mgŭn brei test kơ 49 čô jing hđeh hriăm hră phung bi tuôm jĕ hŏng hđeh mâo klei ruă, snăn lŏ ƀuh truh 7 čô mâo kman virus SARS -CoV2, digơ̆ jing hđeh hriăm hră adŭ 8D dôk hlăm adŭ hŏng hđeh mâo leh klei ruă êlâo anăn.

Ară anei klei suaih pral mơ̆ng jih 8 čô hđeh hriăm hră djŏ COVID-19 ăt hơĭt, digơ̆ dôk mdrao kơ sang mdê mdê mâo phung nai êa drao kăp ksiêm. Truh yang hrue dơ̆ng 19/4 ênoh mnuih djŏ jih jang klei ruă COVID-19 hlăm čar Daklak jing 22 čô, hjăn ƀuôn prŏng Buôn Ama Thuôt mâo 17 čô, hlăm anăn 15 ti sang hră gưl 2 Trưng Vương. Aê mdrao Nguyễn Văn Lý, K’iăng khua kiă kriê bruă mdrao mgŭn ƀuôn prŏng Ƀuôn Ama Thuôt lač, ti anăp klei ruă tưp COVID-19 lŏ bluh đĭ hlăm dŭm hrue êgao, dhar bruă mdrao mgŭn mâo leh klei kčĕ kơ knơ̆ng bruă sang čư̆ êa ƀuôn prŏng mâo hdră mdrơ̆ng hŏng klei ruă tưp COVID-19.