VOV4.Êđê -Tui si klei hâo hưn mơ̆ng anôk bruă kiă kriê klei ruă CDC čar Daklak, hrue 9/8, hlăm čar mâo sa čô mnuih djiê tal 3 kyua klei ruă tưp êngoh bi ƀlĕ êrah, yap mơ̆ng akŏ thŭn truh kơ ară anei. Mnuih ruă anăn kkiêng thŭn 1971, ti ƀuôn hgŭm Êa Tam, ƀuôn prŏng Ƀuôn Ama Thuôt. Tui si găp djuê mnuih ruă hưn, hrue 27/7, mnuih ruă mâo klei bi knăl êngoh hlơr, ruă kŏ, bi êgah hlăm asei mlei, nao dliê tlô m’êa, mnăm leh êa drao amâo klă mta, ƀiădah amâo mâo lưh ôh.

Hrue 1/8, ba mnuih ruă anei kơ sang êa drao Thiện Hạnh lehanăn lŏ ba kơ sang êa drao krĭng Lăn Dap Kngư, mkă dlăng jing mâo klei ruă êngoh bi ƀlĕ êrah Dengue hrue tal 5, mâo klei bi knăl ruă tiê B. Truh hrue 3/8 klei ruă đuĕ nao kjham, ba mnuih ruă kơ sang êa drao Chợ Rẫy. Mnuih ruă djiê ti hrue 7/8. Êngao kơ 3 čô mnuih djiê, yap truh kơ hrue 9/8, čar Daklak mâo leh 2 êbâo 970 čô mnuih mâo klei ruă êngoh bi ƀlĕ êrah, đĭ hĭn êbeh 5 blư̆ mkă hŏng wưng anei thŭn dih./.

        Pô mblang: Y-Ƀel Êban