Anăn jing N.V.P kkiêng thŭn 1963, dôk ti alŭ anôk dôk mrô 2, wăl krah Quảng Phú, kdriêk Čư̆ Mgar, čar Daklak. Tui si P hưn hrue 19/10/2022 ñu đĭ êdeh phiơr mơ̆ng Việt Nam đuĕ nao kơ Dhŭng Afrĭk čiăng hiu čhưn dhing. Hlăm wưng dôk hiu čhưn ênguê anăn ñu đuĕ hiu leh hlăm lu anôk, lehanăn bi tuôm, blŭ hrăm, mă kngan hŏng lu mnuih mơh. hrue 26/10, ñu đĭ êdeh phiơr wĭt kơ Việt Nam trŭn ti tač êdeh phiơr Nội Bài, ktue êlan mâo weh ti tač êdeh phiơr ti Singapore, leh kơ anăn đĭ êdeh phiơr wĭt kơ Daklak. Truh hrue 1/11, ñu mâo klei bi êgah ruă hlăm atŭt klang, lehanăn mâo lu gru bi đuh hrah hlăm tian, hlăm rŏng, snăn nao mkă dlăng kơ sang êa drao. Mơ̆ng hrue 26/10 truh kơ ară anei ñu mâo bi tuôm hŏng lu mnuih hlăm găp djuê lehanăn mnuih riêng gah. Hŏng hlei mnuih jĕ giăm hĭn ñu bi tuôm ară anei ka mâo ôh klei bi knhăl mơ̆ng klei ruă, lehanăn hlăk dôk bi ktlah ti sang. Dhar bruă mdrao mgŭn čar Daklak mă leh mta êa mơ̆ng anôk bi bŏk kplač anăn, lehanăn mă êa bah, êa k’hak ñu mơĭt kơ anôk ksiêm dlăng kman klei ruă tưp Lăn Dap Kngư mkă dlăng.

Knơ̆ng bruă mdrao mgŭn Daklak mâo leh hră kiă kriê dŭm bruă gang mkhư̆ klei ruă tưp anei; mâo nanao êpul kăp răng mjêč ti sang êa drao, anôk bruă mdrao mgŭn kdriêk, wăl krah, ƀuôn prŏng, mâo hdră mdrơ̆ng hŏng klei ruă tưp anei hlăm alŭ wăl, mđĭ hĭn bruă hâo hưn mtô mblang, lehanăn kăp mghaih msir bi pral, lehanăn amâo mâo lui klei ruă tưp anei bluh đĭ ôh./.