Leh 1 hrue kăm tlŏ mgang, dŭm alŭ wăl mâo ngă leh truh êbeh 50% hdră kčah. Hlăm êbeh 38 êbâo hnơ̆ng vắc xin gang mkhư̆ klei ruă khŏ kơ asâo miêo ti ƀuôn prŏng Ƀuôn Ama Thuôt jing anôk mâo lu asâo miêo hĭn êbeh kơ 7.500 hnơ̆ng mâo tlŏ, 3 alŭ wăl mâo mkăp leh êbeh 4 êbâo hnơ̆ng vaccin jing dŭm kdriêk Čư̆ Kuiñ, Krông Pač lehanăn Ea H’leo.

Ară anei, anôk bruă mdrao mgŭn mnơ̆ng rông mkŏ mjing leh bruă mjuăt bi hriăm kơ klei tlŏ mgang, rơ̆ng bi djŏ hdră, êđăp ênang wăt kơ mnuih hiu tlŏ mgang kơ asâo miêo, mkŏ mjing dŭm boh êdeh hiu hâo hưn hŏng alŭ wăl čiăng mâo mmông tlŏ mgang bi djŏ. Lehanăn dŭm anôk mdrao mgŭn mnơ̆ng rông mkŏ mjing hdră tlŏ mgang, sa anôk, hiu tlŏ mgang nao truh hlăm sang mnuih ƀuôn sang./.