VOV4.Êđê- Hrue mbrue (24/8), knơ̆ng bruă sang čư̆ êa čar Daknông mkŏ mjing knăm “Mtrŭt mjhar klei tlŏ vaccine gang mkhư̆ klei ruă tưp Covid 19” thŭn 2022. Tui si klei hưn ti anôk mtrŭt mjhar, truh kơ ară anei mâo leh êbeh 87% ênoh mnuih mơ̆ng 18 thŭn kơ dlông ti Daknông mâo tlŏ leh aruăt tal 3 vaccine gang mkhư̆ klei ruă tưp covid 19, lehanăn anei jing sa boh čar mâo boh tŭ dưn klei tlŏ mgang jăk dôk tal 6 kluôm ala.

Siămdah, klei bi tlŏ mgang ară anei pătdah msĕ si mdei hĕ, boh nik klei tlŏ aruăt tal 2 hŏng hđeh mơ̆ng 5 – truh kgŭ 12 thŭn, aruăt tal 3 kơ hđeh 12 thŭn kơ dlông. Hlăm klei mtrŭt mjhar, knơ̆ng bruă sang čư̆ êa čar Daknông mtă kơ dŭm anôk bruă hlăm kluôm čar mđĭ hĭn bruă đua klam, ktuh êyuh jih ai tiê mtrŭt mjhar hđeh mơ̆ng 5 truh kgŭ 12 thŭn nao tlŏ mgang ênŭm hlăm mlan 8 anei, lehanăn bi leh tlŏ aruăt tal 4 kơ mnuih mơ̆ng 18 thŭn kơ dlông, lehanăn aruăt tal 3 kơ hđeh mơ̆ng 12 truh kgŭ 18 thŭn, tui si klei Phŭn bruă mdrao mgŭn kčĕ./.

Pô mblang: Y-Khem Niê