VOV4.Êđê- Ti anăp klei mâo dleh dưi ksiêm dlăng mơ̆ng klei ruă Covid 19, lu mnuih mâo klei bi êdah mơ̆ng klei ruă êngoh bi ƀlĕ êrah ƀiădah amâo nao kơ sang êa drao mkă dlăng, mdrao klei ruă ôh. Anei jing sa klei soh čhuai kreh mâo mơ̆ng mnuih ƀuôn sang ară anei ti anăp klei ruă êngoh bi ƀlĕ êrah dôk bluh mâo lu. Hlăm kdrêč hruê anei, hmei hâo hưn kơ klei ruă êngoh bi ƀlĕ êrah lehanăn mtă dŭm klei bi knăl kreh mâo čiăng gang mkhư̆ klei ruă êngoh bu ƀlĕ êrah đĭ kơ kjham.

 Hlue si K’iăng nai prŏng, nai prĭn Đỗ Duy Cường - Khua Anôk bruă klei ruă krĭng hlơr, Sang êa drao Bạch Mai: Mơ̆ng akŏ thŭn truh ară anei, hjăn Anôk bruă krĭng hlơr tŭ jum leh anăn mdrao leh kơ dŭm êtuh čô mnuih ruă êngoh bi ƀlĕ êrah Dengue nao đih mdrao, boh nik mâo lu phung kjham msĕ si phung mniê ba tian, phung ruă mâo leh klei ruă êlâo msĕ si ruă kboh, boh ƀleh, ruă tiê, ruă ksŏ amâo thâo hlao… Ênoh mnuih nao đih mdrao mơ̆ng akŏ yan hjan ƀiă ƀiădah đĭ ti lŭ alŭ wăl hŏng dŭm klei bi knăl msĕ si êngoh hlơr, êgah êmăn hlăm asei mlei, bi đuh ti gŭ klĭt, hrŏ hnơ̆ng êrah…

 Klei mdê plah wah êngoh bi ƀlĕ êrah thŭn anei jing mâo lu mnuih ruă kjham hlăm tian prôč, hrŏ hnơ̆ng êrah mâo wăt ƀlĕ êrah nao đih mdrao hlăm êa drao mbŏ êrah. Klei ruă êngoh bi ƀlĕ êrah mâo hlăk êjai ăt mâo klei ruă Covid-19, mnuih ƀuôn sang ăt kăn đei hơĭt ai tiê nao sang êa drao anăn mâo mnuih ruă kjham kơh nao dŏng mdrao, dleh kơ bruă mdrao mgŭn.

 Dŭm klei bi knăl mơ̆ng klei ruă êngoh bi ƀlĕ êrah ênưih čhuai hŏng Covid-19

Hlue si K’iăng nai prŏng, nai prĭn Đỗ Duy Cường: êngoh bi ƀlĕ êrah leh anăn Covid-19 jing klei ruă bi tưp huĭ hyưt kyua kman ngă hŏng dŭm klei bi knăl tal êlâo msĕ, srăng ngă klei čhuai msĕ si: mâo klei bi knăl êngoh, ruă kŏ, êgah êmăn jih asei mlei. Khădah, anei jing dua klei ruă mâo phŭn klei ruă leh anăn êlan mtưp leh anăn boh klei ruă mdê mdê. Covid-19 tưp hlăm êlan bi êwa kyua sô̆ djŏ hŏng êa dŭng, êa bah, bi êngoh bi ƀlĕ êrah tưp kyua kêč kĕ. Êngao anăn, êngoh bi ƀlĕ êrah êdah êdi mâo klei bi kđuh hrah hlăm klĭt, bô̆ mta leh anăn ală hrah, kjham hĭn mâo êrah amâodah ngă truh kơ klei kjham hĭn bi êkŏ êrah. Hŏng phung djŏ Covid-19 snăn êngao kơ phŭn mtưp bi tuôm hŏng phung djŏ Covid-19 snăn lŏ mâo klei bi knăl mâo klei ruă hlăm êlan bi êwa msĕ si mtŭk, dleh bi êwa, amâo thâo ƀâo mnâo. kjham srăng mâo klei bi knăl ruă ksŏ leh anăn toh hroh êlan bi êwa.

 Lu mnuih êngoh bi ƀlĕ êrah čŏng hlao hlăm wang 7 hruê, khădah hlăm brô 5% mnuih srăng mâo klei bi knăl kjham msĕ si ƀlĕ êrah truh kjham kyua hrŏ hnơ̆ng êrah, tơdah amâo hmao ƀuh leh anăn hmao mdrao mgŭn srăng truh kơ djiê.

  Boh nik hlăm boh klei ruă Covid-19 ba dŭm mta klei bi knăl êdei Covid-19 hŏng lu klei bi knăl mdê, snăn brei mnuih ƀuôn sang mđing kơ dŭm klei bi knăl mơ̆ng klei ruă êngoh bi ƀlĕ êrah kyua mâo đa đa klei bi knăl ênưih čhuai hŏng Covid-19 msĕ si: êngoh, êgah êmăn. Brei mnuih ƀuôn sang mđing kơ dŭm klei bi knăl brei thâo răng leh anăn bi jăk, mbĭt anăn mtă brei ksiêm mkă čiăng bi mklă, ñĕ kơ klei lăm lui amâodah čhuai, ngă mâo klei jhat năng ênguôt. Mâo lu mnuih kyua huĭ djŏ Covid-19 anăn knŏng test Covid amâo ksiêm mkă ôh mâo klei ruă êngoh bi ƀlĕ êrah amâo dah hơăi, anăn ênưih ba klei amâo thâo răng hlăm hdră gang mkhư̆ klei ruă.

 Phung thơ̆ng kơ bruă mtă: Klei bi knăl mơ̆ng klei ruă êngoh bi ƀlĕ êrah jing êngoh hlơr nanao, sui 5-7 hruê, mâo wăt ruă kŏ, bi đuh hlăm asei mlei, gŭ klĭt, hrah ală, phung kjham mâo klei bi knăl hưn brei răng mâo hlăm hruê tal 4,5 msĕ si ruă hlăm tian jĕ tiê, čiăng ƀlĕ ô̆, ƀiă nao mơiêk, bi êăt jơ̆ng kngan, đa đa ƀlĕ êrah ti gŭ klĭt, kbiă êrah dŭng, kbiă êrah hlăm jơ̆ng êgei. Hlăm phung mniê mâo klei bi knăl ƀuh mơiêng sui hruê, kjham hĭn kbiă êrah hlăm tian prôč msĕ si hlăm êlan huă ƀơ̆ng, hlăm dlô, kjham hlăm tiê, êrah amâo thâo êkŏ… Tơdah mâo sa hlăm dŭm klei bi kăl anei, brei mnuih ƀuôn sang nao ti dŭm anôk mdrao mgŭn čiăng dưi ksiêm mkă leh anăn mdrao mgŭn, amâo dưi čŏng ktuê dlăng leh anăn mbŏ êa ti sang ôh.

 Dŭm hdră gang mkhư̆ klei ruă êngoh bi ƀlĕ êrah brei mnuih ƀuôn sang hdơr jing đih pĭt kă mŭng, mdjiê hlưat lŏk, kêč ƀloh, răng kriê bi doh leh anăn mđing mđĭ klei suaih pral pô./.

                                               Pô mblang: H’Zawut Ƀuôn Yă