VOV4.Êđê - Leh mâo Phŭn bruă mdrao mgŭn mkăp brei ba yua, dŭm mta êa drao mdrao Covid-19, êdah kdlưn jing Molnupiravir dưi mbha lu kơ anôk ba čhĭ. Khădah, hlue si klei mtă, bruă ba yua êa drao mdrao Covid-19 brei mơ̆ng kyua phung aê mdrao čih hră, tơdah čŏng blei leh anăn čŏng mdrao srăng ba lu klei amâo jăk

-Akâo kơ aê mdrao brei thâo hlei jing F0 srăng dưi mdrao hŏng êa drao Molnupirawil?

-Bác sĩ Lại Quang Miễn: Leh mâo knơ̆ng bruă sang čư̆ êa čar Daklak brei čar mdrao hŏng êa drao Molnupiravir kơ mnuih ruă F0 ti sang snăn truh hrue 19/1/2022 anôk bruă mdrao mgŭn čar mkŏ mjing leh hdră mdrao kơ F0 ti sang amâo mâo klei bi knăl klă mngač amâodah mâo mơh klei bi knăl êdu. Snăn klei ktrâo atăt kơ bruă mdrao mgŭn hŏng êkei lehanăn mniê mơ̆ng 18 thŭn kơ dlông. Amâo mâo mdrao ôh hŏng mnuih 18 thŭn kơ gŭ. Amâodah hŏng phung mniê halwk dôk ba tian, dôk bi mam anak. Hŏng mnuih ruă mâo leh klei ruă êlâo adôk ka hơĭt snăn kăn dưi mdrao rei. Mâo đa đa phung khua thŭn leh, lŏ mâo klei ruă êlâo, mâo klei bi knăl ruă kboh, ruă tiê, amâodah boh ƀleh ăt kăn dưi rei mdrao hŏng êa drao Molnupiravir.

-Bruă mnuih ƀuôn sang čŏng blei êa drao Molnupiravir pioh mdrao covid 19 snăn si boh mơ̆ng klei anăn srăng tuôm?

-Bác sĩ Lại Quang Miễn: Tơdah phung ƀuôn sang čŏng duah blei mă pô êa drao mdrao klei ruă mkh kman hŏng Molnupiravir amâo mâo djŏ hŏng klei mtă mtăn, kyua đa đa mâo klei amâo mâo guôp, snăn jing dleh srăng hlao, tăp năng klei ruă lŏ đuĕ nao kơ kjham hĭn. Hdră êlao mdrao mgŭn bi klă leh anei jing klei ruă tưp êpul A, jing êpul klei ruă tưp huĭ hyưt hĭn, kyuanăn mnuih ruă êjai čiăng yua êa drao bi mâo klei nai aê mdrao mtă mtăn, čih djŏ mta anăn êa drao bi blei. Dah čŏng duah blei mă hjăn jing ênưih lĕ hlăm klei amâo mâo jăk drei amâo mâo diưi thâo êlâo ôh. Yap truh kơ ară anei, anôk bruă mdrao mgŭn dôk mdrao F0 ti sang hlăm brô 18 êbâo čô mnuih ruă, hlăm anăn mâo leh truh 7 êbâo 638 čô mnuih hlao, hlăk dôk mdrao hlăm brô 10 êbâo 415 čô mnuih, lehanăn lŏ ba kơ sang êa drao mâo 43 čô mnuih. Bi phung F0 dôk mdrao ti sang dah ba yua êa drao Molnupiravir snăn hmei dôk mdrao hlăm brô 670 čô mnuih, ƀuh jing mâo boh tŭ dưn jăk, ka tuôm mâo ôh mnuih êa drao ngă đuĕ nao kơ kjham, thâodah truh kơ djiê. Jih jang mnuih mdrao hơĭt lehanăn hlao sơăi.

-Dah snăn, mâo mơ̆ klei Aê mdrao čiăng mtă mtăn hŏng mnuih dôk mâo klei ruă tưp Covid 19?

Bác sĩ Lại Quang Miễn: Ară anei phŭn bruă mdrao mgŭn mâo leh klei mtă kơ jih jang mnuih djŏ klei ruă tưp đăm mâo klei kdjăt kƀla ôh, kăn duah rŭng răng huĭ hyưt rei. Ngă bi kjăp 5 mta klei mtă, čiăng đru mgang brei gŏ sang pô lehanăn hŏng jih jang yang ƀuôn. Ară anei hmei mkŏ mjing leh mâo 25 êpul anôk hiu kăp mdrao. Phung nai êa drao kơ anăn mâo leh klei mjuăt bi hriăm ƀhĭ klĭ kơ bruă mdrao mgŭn mnuih ruă tưp ti sang, mdrao hŏng êa drao kháng sinh. Kyuanăn, Tơdah djŏ klei ruă tưp, mnuih ruă lehanăn mnuih hlăm sang bi nao hưn kơ klei ruă pô hŏng anôk mdrao mgŭn čiăng dưi mâo nanao klei mtă mtăn đru kčĕ kơ jih jang hdră mdrao ti sang. Leh mâo klei mtă brei mdrao kơ sang mdê mdê snăn nai êa drao srăng bi blŭ hrăm jêñ jêñ, kăp mkă hnơ̆ng kboh êran, hnơ̆ng h’uh asei mlei, lehanăn ya mta klei bi knăl hlăm klei hdĭp sa hrue dua blư̆ aguah ưm lehanăn tlam kăp hưn hŏng nai êa drao. Tơdah ƀuh mnuih ruă đuĕ nao kơ kjham snăn mâo nai êa drao nao đru mtam, ksiêm dlăng lehanăn ktrâo atăt hdră mdrao, thâodah brei ba kơ sang êa drao pioh lŏ mdrao mgŭn.

-Lač jăk kơ aê mdrao lu!