Dôk kriê dlăng anak êngoh bi ƀlĕ êrah ti Anôk dŏng mdrao phung hđeh leh anăn hđeh mrâo kkiêng, Sang êa drao prŏng krĭng Lăn Dap Kngư, amai Nguyễn Thị Nguyệt Ánh, ti să Ea Tiêu, kdriêk Čư̆ Kuiñ, čar Dak Lak brei thâo, kyua amâo răng anăn hlăk anak mphŭn mâo klei ruă gŏ sang knŏng blei êa drao brei ñu mnăm đuč. Leh truh kjham kơh nao ti sang êa drao anăn ñu truh klei toh hroh êlan bi êwa kjham, mâo klei bi knăl amâo jăk hlăm êrah, mbŏ êrah.

“Anak êngoh leh anăn kâo mâo bruă 2 hruê, mơĭt ñu kơ sang găp djuê, truh hruê tal 3 kơh nao ksiêm mkă snăn êngoh ruă kŏng đŏk leh anăn mnăm êa drao 1 hruê, truh hruê tal 4 đung hlăm klĭt snăn ba dŏng mdrao ti sang êa drao kdriêk Čư̆ Kuiñ leh anăn ba tinei. Ti sang ƀlĕ ô̆ ƀiădah truh tinei kjham leh snăn ăt huĭ mơh.”

 Hlăm jhưng ti djiêô anăn, amai Hoàng Thị Điệp ti să Čư̆ Êbur, ƀuôn prŏng Ƀuôn Ama Thuôt ăt dôk răng kriê anak êkei 8 thŭn êngoh bi ƀlĕ êrah. Anak amai Điệp nao đih mdrao hlăm boh klei hrŏ tiểu cầu lu, phung aê mdrao mbŏ êa nanao:

       “Knăm pă hruê kăm êlâo ĕ mâo klei bi knăl êngoh, leh anăn kâo ba ñu nao dŏng mdrao ti Sang êa drao ƀuôn prŏng ksiêm mkă snăn klah čŭn ĕ êngoh ruă kŏng đŏk, tlâo hruê êdei lŏ ksiêm mkă snăn ƀuh ĕ êngoh bi ƀlĕ êrah. Truh mmăt snăn ĕ truh kjham dŏng mdrao mjêč ti Sang êa drao prŏng. Hlăk ĕ hriê mdrao tinei snăn êngoh hrŏ leh, ƀiădah mbŏ êa lu leh anăn tiểu cầu hrŏ lu snăk leh anăn dôk hlăm boh klei huĭ hyưt.”

 Ti sang êa drao prŏng krĭng Lăn Dap Kngư mâo 3 Anôk dôk tŭ jum, mdrao phung êngoh bi ƀlĕ êrah anăn jing Anôk mdrao kơ klei ruă tưp, mdrao kơ hđeh leh anăn Anôk mdrao mjêč kơ phung hđeh leh anăn hđeh mrâo kkiêng. Hlue si ênoh mrô ksiêm yap mơ̆ng dŭm Anôk mdrao mơ̆ng akŏ thŭn truh ară anei, dŭm anôk mdrao tŭ mă leh anăn mdrao kơ hlăm brô 500 čô êngoh bi ƀlĕ êrah, kƀĭn lu hlăm mlan 7 leh anăn akkŏ mlan 8. Hlue si aê mdrao Hoàng Ngọc Anh Tuấn, Khua Anôk mdrao mjêč kơ phung hđeh leh anăn hđeh mrâo kkiêng, phung hđeh đih mdrao mâo lu hđeh êngoh bi ƀlĕ êrah hnơ̆ng kjham, leh hriê đih mdrao hlăm boh klei ƀlĕ ô̆ êrah, toh hroh klei suaih pral… ngă huĭ hyưt kơ klei hdĭp leh anăn klei suaih pral phung hđeh.

         “Grăp čô hriê đih mdrao tinei lĕ hlăm klei kjham sơăi. Čang hmăng phung amĭ ama amâodah phung kriê dlăng hđeh tơdah ƀuh hđeh mâo klei bi knăl êngoh kjham, mâo klei bi knăl bi knhăk amâodah lui huă ƀơ̆ng snăn ba ti anôk mdrao giăm hĭn čiăng ksiêm mkă leh anăn ñĕ kơ klei truh kjham amâo lŏ hmao mdrao.”

 Hlue si Anôk bruă ksiêm dlăng klei ruă čar Dak Lak mơ̆ng akŏ thŭn truh ară anei, kluôm čar mâo 1.325 čô êngoh bi ƀlĕ êrah. Hjăn nơ̆ng akŏ mlan 88 truh ară anei mâo êbeh 400 čô ruă. Ƀuôn prŏng Ƀuôn Ama Thuôt jing alŭ wăl mâo ênoh mnuih êngoh bi ƀlĕ êrah lu hĭn čar, hŏng 422 čô. Hoàng Hải Phúc, Khua anôk bruă ksiêm dlăng klei ruă čar Dak Lak brei thâo, ti anăp boh klei ruă tưp ti čar Dak Lak đĭ pral leh anăn dleh ktuê dlăng, anôk bruă mtă kơ Knơ̆ng bruă mdrao mgŭn mbŏ thiăm ênoh bi liê gang mkhư̆ klei ruă tưp mjêč, adôk kƀah hŏng ênoh bi liê hlăm brô 500 êklăk prăk.

         “Thŭn anei klei ruă tưp đĭ lu leh anăn hmei đru leh kơ dŭm kdriêk lu snăk, ƀiădah ară anei kơ mnơ̆ng dhơ̆ng mdrao mgŭn, êa drao ăt msĕ mơh masin snăn hmei dôk hưn hŏng Knơ̆ng bruă mdrao mgŭn čiăng akâo mbŏ. Knơ̆ng bruă mdrao mgŭn hưn hŏng Knơ̆ng bruă ngăn prăk, bi Knơ̆ng bruă ngăn prăk hưn hŏng Knơ̆ng bruă čiăng bi mlă si ngă snăn ăt dôk guôn mơh. Hmei ăt čang hmăng mâo ênoh prăk bi liê hnưm čiăng blei êa drao, giêt krih êa drao, masin krih čiăng đru rơ̆ng hơĭt hlăm wưng kơ anăp.”

Hlue si klei đăo knăl mơ̆ng bruă mdrao mgŭn, mơ̆ng ară anei truh knhal jih thŭn 2024, klei ruă êngoh bi ƀlĕ êrah ênưih bluh mâo lu anôk ti krĭng Lăn Dap Kngư, hlăm anăn mâo čar Dak Lak. Bruă gang mkhư̆ klei ruă tưp dôk tuôm lu klei dleh dlan kyua hlăm mnuih ƀuôn sang ăt adôk ngă ngơi mang, bi bruă mdrao mgŭn ti đa đa alŭ wăl snăn dôk kƀah êa drao leh anăn kdrăp mdrao mgŭn./.