VOV4.Êđê- Hruê mbruê 13/7, êpul ngă bruă mơ̆ng phŭn bruă mdrao mgŭn mơ̆ng Bùi Khánh Toàn, khua kiă kriê anôk bruă ksiêm dlăng kman krĭng Lăn Dăp Kngư jing khua êpul nao ksiêm dlăng leh bruă gang mkhư̆ klei ruă êngoh bi blĕ êrah ti čar Dak Lak. Êpul nao truh leh ti dŭm anôk bruă, ksiêm dlăng bruă gang mkhư̆ klei ruă êngoh bi blĕ êrah ti kdriêk Lăk – jing anôk mâo lu mnuih mâo klei ruă anei ti čar Dak Lak leh anăn ksiêm dlăng bruă drông jum, mdrao klei ruă êngoh bi blĕ êrah ti sang êa drao prŏng krĭng Lăn Dăp Kngư.

Hluê si Bùi Khánh Toàn, ară anei klei ruă êngoh bi blĕ êrah ti alŭ wăl čar Dak Lak dôk dleh dưi ksiêm dlăng, mâo klei hŭi hyưt bluh đĭ ktang hlăm hruê mmông kơ anăp, kyuanăn êngao kơ bruă hâo hưn kơ mnuih ƀuôn sang ngă jăk dŭm hdră êlan gang mkhư̆ klei ruă tưp, klei drông jum, mdrao mgŭn kơ mnuih ruă ăt yuôm bhăn êdi. Yap truh kơ ară anei, čar Dak Lak mâo leh giăm 1.300 čô mâo klei ruă anei hŏng 76 anôk mâo klei ruă, đĭ 4 blư̆ mkă hŏng wưng anei thŭn dih. Klei ruă êngoh bi blĕ êrah mâo hlăm jih jang 15 kdriêk, wăl krah, ƀuôn prŏng hlăm čar.

Pô mblang: Y-Ƀel Êban