-Tui si nai prĭn Fahad Razak, sa čô truăn kơ bruăk siêm duah ti Canada kơ klei ruă tưp anei, brei thâo, jih jang dŭm mta bi mlih mơ̆ng virus corona kreh mâo hlăm yan hla luh, lehanăn ênoh mnuih tưp djŏ jing lu lehanăn djiê lu mơh. Tơdah klei msĕ snăn thŭn anei dôk hyưt srăng lŏ tuôm sa blư̆ dơ̆ng. Nai prĭn Fahad Razak mñă, tơdah drei amâo lŏ ƀuh ôh sa gưl klei ruă tưp mrâo lŏ bluh đĭ mơ̆ng Covid 19 hlăm yan êăt anei, snăn phung truăn kơ bruă anei dưi bi êdah yơh klei ruă tưp prŏng anei srăng jih hlăm yan mnga.

-Kñăm lŏ dơ̆ng gĭr hlăm bruă mdrơ̆ng hŏng klei ruă tưp Covid 19 hlăk dôk hlăm wưng mjêč mêč, WHO mtă bi mâo 6 hdră êlan kơ dŭm ala čar hgŭm. Êlâo hĭn jing lŏ dơ̆ng tlŏ mgang bi ênŭm jih jang mnuih ênưih tưp djŏ hĭn. Tal dua jing, lŏ dơ̆ng mkă dlăng, lehanăn hlak mblang zen virus pioh ktue dlăng klei bi mlih, bi klin djăp mta bruă ngă, lehanăn mâo klei mkă dlăng kman Sar CoV-2 hŏng jih jang mnuih mâo klei ruă hlăm êlan bi êwa mkăn, hlăm anăn mâo mbĭt hŏng hdrak ngă. Tlâo jing, rơ̆ng bi mâo sa hdră dlăng kriê kjăp mnuih ruă covid 19, bi klin jih jang bruă dlăng kriê klei suaih pral tal êlâo, mkŏ mjing hdră mkhư̆ gang huĭdah lŏ mâo klei bluh đĭ, mđrĭng hŏng bruă mprăp djăp kdrăp mă bruă, lehanăn mnuih ngă bruă. Pă jing, mâo nanao hdră gang mkhư̆, ksiêm klei djŏ tưp kman hlăm sang êa drao. Leh kơ anăn, jih jang knŭk kna bi trông mngač hĭn hŏng anôk bruă mdrao mgŭn kơ ya mta klei bi mlih hlăm hdră êlan mdrơ̆ng hŏng klei ruă tưp Covid 19.

            -Ti Việt Nam, tui si phŭn bruă mdrao mgŭn ksiêm yap, mơ̆ng akŏ mlan 10 truh kơ hrue 24/10, Việt Nam mâo leh giăm 22 êbâo čô mnuih djŏ klei ruă tưp Covid 19 mrâo. Tĭng truh hrue 23/10 kluôm ala mâo tlŏ mgang leh giăm 262 êklăk aruăt vaccine gang mkhư̆ klei ruă tưp Covid 19.

-Blŭ hrăm gĭt gai ti anôk bi kƀĭn hyuă kjăp hĭn bruă mdrơ̆ng hŏng klei ruă tưp, lehanăn bruă tlŏ bi ênŭm vaccine Covid 19, mâo mkŏ mjing leh hlăm hrue 20/10 leh êgao, k’iăng khua phŭn bruă mdrao mgŭn Nguyễn Thị Liên Hương mtă kơ djăp alŭ wăl lŏ dơ̆ng mđing hĭn ngă jih jang bruă mdrơ̆ng hŏng klei ruă tưp tui si knŭk kna, khua knŭk kna lehanăn tui si Phŭn bruă mdrao mgŭn gĭt gai, truh hŏng djăp phŭn knơ̆ng dhar bruă djŏ tuôm. Ngă bi kjăp, bi djăp, bi ênŭm jih jang bruă mdrơ̆ng hŏng klei ruă tưp, boh nik tlŏ bi ênŭm vaccine gang mkhư̆ klei ruă tưp Covid 19, ksiêm yap bi ênŭm boh tŭ dưn klei tlŏ mgang, lehanăn mâo klei hâo hưn mtô mblang, čiăng kơ phung ƀuôn sang thâo săng... Boh nik êjai yan puih mnga dơ̆ng truh, jing yan ênưih snăk djŏ klei ruă tưp lu, lehanăn nao đih kơ sang êa drao lu mơh.

-Ti Daklak, boh klei ruă tưp Covid 19 hlăm mlan 10 hlăk đuĕ nao kơ hrŏ ênoh mnuih djŏ. Yap truh hrue 24/10 mâo giăm 200 čô mnuih ruă, hrŏ leh êgao mkrah mkă hŏng ênoh mlan 9. Klei năng mđing hĭn, mâo sa hrue hlăm mlan 10, Daklak amâo mâo ôh mnuih djŏ mrâo. Siămdah, mlan 10 čar ăt mâo leh dua čô mnuih djiê kyua klei ruă tưp Covid 19, jih dua čô mnuih djiê anăn jing phung khua thŭn leh sơăi, mâo leh lu mta klei ruă êlâo, lehanăn ka tuôm tlŏ ôh vaccine gang mkhư̆ Covid 19.

-Bruă tlŏ vaccine gang mkhư̆ klei ruă tưp Covid 19 ăt dôk mâo bruă mdrao mgŭn Daklak hlue ngă jih ai tiê hlăm mlan 10. Yap truh hrue 20/10, Daklak mâo tlŏ leh aruăt tal 1 lehanăn tal 2 kơ hđeh mơ̆ng 12 thŭn kơ dlông. Aruăt tal 3 kơ êpul mơ̆ng 18 thŭn kơ dlông djăp 87,2% lehanăn aruăt tal 4 êbeh 70%. Aruăt tal 3 kơ êpul mơ̆ng 12 thŭn kơ dlông djăp giăm 75%. Daklak ăt mâo tlŏ leh aruăt tal 1 kơ hđeh mơ̆ng 5 truh 11 thŭn, lehanăn aruăt tal 2 kơ êpul anei mâo leh truh 56%. Čar ăt dôk hyuă kjăp bruă gang mkhư̆ klei ruă tưp Covid 19, hŏng 3 kmah gơ̆ng phŭn anăn jing: Mkă dlăng kman, ngă klei bi ktlah, lehanăn mdrao mgŭn. Mbĭt hŏng anăn mtă kơ jih jang dŭm knơ̆ng dhar bruă êpul êya, lehanăn jih jang mnuih mđrăm mbĭt bi mă bruă, lŏ dơ̆ng ngă jăk 2 mta klei mtă guôm ƀô̆ lehanăn rao kngan, lehanăn gưt jih jang ya mta bruă mtă hlăm klei mdrơ̆ng hŏng klei ruă tưp Covid 19 hlăm boh klei mrâo mơ̆ng anôk bruă mdrao mgŭn djăp gưl.