Pô djiê mrâo hĭn mơ̆ng klei ruă anei jing aduôn Đ.T.C (k’kiêng thŭn 1956, ti alŭ Đà Bắc, să Ia Lâu, Kdriêk Čư Prông). Hluê anăn, hlăk mlan 10 thŭn 2022, aduôn C mâo asâo kĕ ti jơ̆ng. Leh anăn asâo anăn phung hlăm sang čăm djiê. Aduôn C čŏng rao anôk êka hŏng êa, amâo mâo nao tlŏ mgang Việt Nam gang mkhư̆ klei ruă.

Mơ̆ng akŏ thŭn 2023 truh kơ ară anei, ti čar Gia Lai mâo leh 5 čô djie kyua klei ruă anei. Hluê si klei tĭng mkă, wưng thŭn 2015 – 2022, čar Gia Lai mâo 33 čô djiê kyua klei ruă khŏ. Hluê si anôk bruă ksiêm dlăng klei ruă tưp čar Gia Lai, Klei ruă khŏ mâo nanao hlăm alŭ wăl kyua bruă duh mkra dôk dleh dlan, mnuih ƀuôn sang ka thâo săng ôh kơ bruă tlŏ mgang vaccine leh djŏ mnơ̆ng rông kĕ. Klei mưng rông asâo miêo phưi tha ăt ngă kơ bruă gang mkhư̆ leh anăn ksiêm dlăng klei ruă dleh dlan hĭn.