Hlue si klei hưn hlăm klei bi kƀĭn, ênoh mnuih djiê kyua klei ruă asâo miêô khŏ kĕ kluôm ala mơ̆ng akŏ thŭn truh ară anei jing 64 čô, ti dŭm alŭ wăl phŭn msĕ si Gia Lai, Nghệ An, Điện Biên, Bình Phước. Hlăm anăn, Gia Lai mâo 11 čô, jing alŭ wăl mâo ênoh mnuih djiê kyua klei ruă anei lu hĭn kluôm ala, khăng dôk mrô sa kơ klei ruă anei hlăm dŭm thŭn êgao.

Ti anôk bi kƀĭn, phung bi ala bi trông kơ boh klei ruă asâo miêo khŏ kĕ kơ mnuih ti Việt Nam leh anăn krĭng Lăn Dap Kngư, dleh dlan lông dlăng leh anăn dŭm hdră msir, bi trông hdră msir kriê dlăng leh anăn mđĭ klei tlŏ vaccin kơ asâo; hdră gang mkhư̆ klei ruă anei kơ mnuih; bruă klam mơ̆ng bruă sang čư̆ êa leh anăn bruă djŏ tuôm ti alŭ wăl…. Hlue si klei mtă mơ̆ng phung thơ̆ng kơ bruă hlăm klei bi kƀĭn, ară anei klei ruă asâo miêo khŏ kĕ ka mâo ôh êa drao mdrao. Hdră gang mkhư̆ jăk hĭn jing tlŏ mgang kơ mnơ̆ng rông leh anăn tlŏ vaccin gang mkhư̆ klei ruă anei tơdah asâo, miêô đing mâo klei ruă khŏ kĕ, jăk hĭn jing tlŏ êlâo kơ 24 mmông leh asâo, miêo kĕ./.