VOV4.Êđê - Leh 2 thŭn tŭ klei hmăi amâo mâo jăk mơ̆ng klei ruă tưp Covid-19, bruă mdrao mgŭn knŭk kna ti čar Gia Lai tuôm hŏng lu klei dleh dlan msĕ si: Mnuih mă bruă mdei mă bruă, nao mă ti sang êa drao êngao knŭk kna, bruă ngăn prăk amâo mâo klei čŏng pô dưi duah, mâo klei hŭi hyưt hmăi amâo mâo jăk truh kơ bruă mdrao mgŭn. Bruă anei čiăng kơ klei ruh mgaih dŭm klei dleh kpăk hlăm bruă mdrao mgŭn leh anăn klei čŏng ngă bruă mơ̆ng dŭm anôk bruă mdrao mgŭn knŭk kna.

Hlăm knhal jih mlan 7 leh êgao, Knơ̆ng bruă mdrao mgŭn Gia Lai mâo leh klei tĭng dlăng kluôm kơ klei knuă druh bruă mdrao mgŭn akâo mdei bruă, nao mă bruă ti dŭm anôk bruă mdrao mgŭn êngao knŭk kna mơ̆ng akŏ thŭn 2021 truh kơ mlan 6/2022. Hluê anăn, mâo 7 mta phŭn djŏ tuôm kơ klei hnư hrui wĭt ƀiă, klei kpĭ bruă mă, wăl anôk mă bruă amâo êđăp ênang, kƀah kdrăp mnơ̆ng hlăm bruă ksiêm mkă dlăng, mdrao mgŭn, klei găl dưi mjuăt bi hriăm, mđĭ klei thâo dôk êdu kƀah.

Hlăm anăn, klei kpăk djŏ tuôm kơ prăk mlan phung aê mdrao mâo leh Anôk bruă mdrao mgŭn Gia Lai lač klă: Čiăng mâo hră bi mklă klei hriăm bruă, phung aê mdrao mâo ƀiă êdi 7,5 thŭn hriăm bruă, hŏng ênoh bi liê lu hĭn mkă hŏng bruă mkăn. Ƀiădah boh sĭt, prăk mlan tĭng msĕ si bruă mkăn. Mta mkăn, ênoh ksiêm mkă dlăng, mdrao klei ruă ti dŭm anôk bruă mdrao mgŭn knŭk kna ba yua ară anei hluê si Asăp mtrŭn 37/2015 thŭn 2015 mâo Phŭn bruă mdrao mgŭn mtrŭn. Hlăk Asăp mtrŭn mâo mkra mlih, thiăm mbŏ, ƀiădah ênoh mkă dlăng, mdrao klei ruă ăt msĕ hđăp. Lý Minh Thái - K’iăng khua knơ̆ng bruă mdrao mgŭn Gia Lai brei thâo:Knŏng ti Gia Lai, ti anôk bruă knŭk kna, prăk hrui mơ̆ng bruă mkă dlăng, mdrao klei ruă truh 94%. Hlăm anăn, prăk mdrao mơ̆ng Ênua mdrao mgŭn lu hĭn, truh 90%. Msĕ snăn, klei kpăk hlăm bruă čŏng pô duah prăk ti Gia lai kơ klei bi mklă prăk mkă dlăng, mdrao klei ruă ka dưi rơ̆ng kjăp, prăk hrui mâo ƀiă, srăng hmăi truh kơ hnư hrui wĭt mơ̆ng êpul êya bruă anăn”.

Ăt mâo msĕ klei mĭn anei, Phạm Bá Mỹ- Khua anôk bruă mdrao mgŭn Gia lai brei thâo, ênoh prăk mkă dlăng, mdrao klei ruă ară anei ka dưi rơ̆ng kjăp, ngă truh kơ klei ka djăp ênŭm. Tơdah klei anei dưi ruh mtlaih, sang êa drao srăng dưi msir mghaih lu mta klei. “Tơdah ênoh prăk anei tĭng djŏ, tĭng ênŭm srăng dưi msir mghaih klei tĭng dlăng ară anei. Mơ̆ng anăn srăng mâo hnư hrui wĭt lu hĭn. Hnư hrui wĭt lu êngao kơ tla prăk mlan kơ phung aê mdrao snăn lŏ tĭng tla thiăm prăk mlan. Tal 2 knŭk kna mâo hdră đru grăp thŭn snăn ăt srăng đĭ lu. Đĭ prăk mlan lehanăn mđĭ klei đru snăn klei hdĭp mnuih ƀuôn sang srăng dưi mkra mđĭ.

Ară anei, anôk bruă mdrao mgŭn knŭk kna ti Gia Lai mâo 12 anôk gưl čar, 17 anôk bruă ti dŭm kdriêk, wăl krah, ƀuôn prŏng mbĭt hŏng 220 anôk bruă să, ƀuôn hgŭm. Phung knuă druh bruă mdrao mgŭn mâo giăm 4.900 čô, hlăm anăn mâo êbeh 920 čô mâo hnơ̆ng hriăm aê mdrao kơ dlông. Dŭm mta mrô kơ bruă mdrao mgŭn msĕ si aê mdrao, ênoh jhưng đih/êbâo čô ƀiă hĭn mkă hŏng hnơ̆ng kah knar kluôm ala. Hdră duh kơ kdrăp mnơ̆ng dôk kƀah, ka djăp ênŭm.

Aê mdrao tŭ kdlưn Nguyễn Hữu Nam – Khua hđăp anôk bruă mdrao mgŭn čar Gia lai brei thâo, êjai dôk guôn dŭm bruă anei bi ruh mtlah, čar Gia Lai brei pral msir mghaih. Hluê si Nam, klei yuôm hĭn ară anei, čar brei mâo hdră mtrŭn jăk găl, jak iêu djŏ guôp, mkra mđĭ anôk mă bruă ti dŭm anôk bruă knŭk kna, čiăng diñu h’ĭt ai tiê dôk mă bruă. Mbĭt anăn, anôk bruă mdrao mgŭn knŭk kna brei mâo hdră mă bruă mrâo, mđĭ hdră dlăng kriê mnuih ruă jăk hĭn, mơ̆ng anăn jak iêu lu mnuih ruă nao mkă dlăng, mđĭ klei čŏng pô mâo hnư hrui wĭt. “Klei čŏng pô mâo prăk kăk, mjing sa anôk bruă khuăt lehanăn tŭ dưn, mă bruă jăk. Msĕ si anôk bruă mdrao mgŭn êngao knŭk kna čŏng diñu pô s’aĭ, kyua anăn tơdah ruah mnuih mă bruă, amâo dưi ngă brei mdei mtam. Êngao anăn, brei mâo klei bi mlih hlăm hdră kiă kriê. Phung khua bruă mdrao mgŭn brei thâo ba yua mnuih thâo, đăm mdưm klei tŭ kơ pô jing mrô sa, mbĭt anăn brei mđing kơ klei tŭ kơ mnuih mă bruă êlâo hĭn, leh kơnăn truh kơ klei đĭ kyar mơ̆ng sang êa drao, hnơ̆ng tŭ bruă mkă dlăng klei ruă. Anei yơh jing yuôm bhăn hĭn.

Ksor Phước, Khua phŭn bruă hlŏng klam Khua dhar bruă djuê ana gưl XI, Khua bruă Đảng hđăp, Khua bi ala anôk bruă kƀĭn ala hđăp mơ̆ng Gia Lai lač, duh bi liê, dlăng kriê klei suaih pral mnuih ƀuôn sang jing duh kơ hdră mđĭ kyar lăn čar. Ñu đăo knang, knŭk kna lehanăn dŭm phŭn, dhar bruă srăng hnưm mâo hdră ruh mtlaih klei dleh dlan kơ anôk bruă mdrao mgŭn Gia Lai lehanăn kluôm ala: “Lu wưng păn bruă, Đảng – knŭk kna drei mđing êdi kơ hdră mtrŭn lehanăn klei prăk mlan kơ phung knuă druh, mnuih mă bruă hlăm anôk bruă kđi čar hluê hdră mđĭ hĭn hnơ̆ng tŭ jăk. Drei ƀuh, brei Knŭk kna gĭt gai dŭm anôk bruă djŏ tuôm mbĭt hŏng anôk bruă mdrao mgŭn hgŭm kngan msir mgaih, ruh mtlaih dŭm klei dleh, lông dlăng anăn./.

H’Nêč pô mblang