Trần Thị Tuyết Hạnh dôk ti să Čư̆ An, kdriêk Đăk Pơ, čar Gia Lai jing gŏ sang ƀun ƀin êdi. Ung mâo klei ruă duam, phung anak kăn mâo klei găl dưi đru, kyuanăn khădah asei pô awăt leh, ñu ăt krŏng ală, kgŭ ưm, mă bruă suăi êman. Mơ̆ng hruê thâo gŏ sang pô dôk hlăm êpul mâo klei đru blei hră ênua bruă mdrao mgŭn, aduôn Hạnh gĭr duah lĭng čan, blei kơ jih 5 čô hlăm gŏ sang.

 “Gŏ sang kâo mâo 5 cô, êjai ka mâo hdră đru kâo blei kơ grăp čô sa, amâo mâo klei găl blei kơ jih 5 čô, ƀiădah ară anei pô bleu dưi đru 40%, kyuanăn dôk 60% gŏ sang ăt gĭr lĭng čan blei jih kơ 5 čô hlăm sang mâo hră ênua bruă mdrao mgŭn. Kyuadah hlăm sang mâo ung kâo ruă kjham hĭn, ruă 15 thŭn hŏng anei leh”.

Amai Đinh Thị Bước ăt jing sa hlăm dŭm gŏ sang ƀun ƀin ti ƀuôn Pơ Nang, să Tú An, wăl krah An Khê ăt dưi mâo klei đru blei ênua bruă mdrao mgŭn. Amai Bước brei thâo, gŏ sang amai ƀuh mâo klei hơĭt ai tiê leh jih jang 6 čô hlăm gŏ sang dưi mâo klei đru 100% ênua bruă mdrao mgŭn mơ̆ng hdră êlan đru mơ̆ng knŭk kna. Bruă anei mkŏ mjing klei găl kơ gŏ sang dưi mdul ƀiă prăk kăk tơdah tuôm hŏng klei ruă duam. Amai Bước brei thâo: “Mâo klei uêñ mĭn mơ̆ng knŭk kna gŏ sang kâo jhŏng blei ênua bruă mdrao mgŭn čiăng jăk kơ klei suaih pral. Hlăm sang, phun mduôn, phung hđeh grăp blư̆ nao mkă dlăng ti dŭm anôk mdrao mgŭn amâodah sang êa drao dưi mâo dŭm mta klei mdrao mgŭn jăk êdi”.

Wưng thŭn 2023 – 2025, êngao kơ hnơ̆ng klei đru mơ̆ng ngăn prăk gưl dlông čuăn hluê si klei bhiăn Ênua bruă mdrao mgŭn, hluê si hdră mtrŭn mrô 48 mơ̆ng Êpul gơ̆ng bruă ƀuôn sang čar Gia Lai, ngăn prăk alŭ wăl srăng đru 30% hnơ̆ng tla prăk ênua bruă mdrao mgŭn hŏng gŏ sang giăm ƀun ƀin leh anăn hđeh sang hră jing mnuih djuê ƀiă, đru 10% hŏng phung dôk hlăm gŏ sang ngă bruă lŏ hma, dliê kmrơ̆ng, rông kan hdang mâo hnơ̆ng klei hdĭp kah knar hluê si klei čuăn mơ̆ng knŭk kna. Hluê ngă hdră êlan anei, knŏng ti wăl krah An Khê đru leh kơ giăm 16.000 čô. Trịnh Duy Phước – Khua kiă kriê bruă ênau yang ƀuôn wăl krah An Khê, čar Gia Lai brei thâo, đăo knăl truh kơ jih thŭn anei, An Khê srăng mao hlăm brô êbeh 30.000 čô dưi mâo klei đru tla ênua bruă mdrao mgŭn anei.

 “Leh mâo hdră mtrŭn mơ̆ng Êpul gơ̆ng bruă ƀuôn sang čar, anôk bruă bi mguôp keh dŭm bruă Đảng să, bruă sang čư̆ êa să, ƀuôn hgŭm ăt msĕ hŏng dŭm anôk bruă djŏ tuôm hâo hưn, mtrŭt mjhar mnuih ƀuôn sang čiăn thâo săng klă dŭm hră êlan mơ̆ng Đảng leh anăn knŭk kna. Ênua bruă yang ƀuôn ăt hur har bi mguôp hŏng dŭm să, ƀuôn hgŭm čiăng mkŏ mjing dŭm mmông blŭ hrăm, mbha hră pŏk, panô, ap phích hâo hưn, boh nik tŭ dưn hĭn jing klei blŭ hrăm hŏng mnuih ƀuôn sang čiăng wĭt lač dŭm klei dleh kpăk mơ̆ng mnuih ƀuôn sang djŏ tuôm hŏng hdră êlan ênua bruă mdrao mgŭn.