Thŭn hriăm anei, Sang hră gưl sa Nguyễn Viết Xuân (wăl krah Nhơn Hòa, kdriêk Čư̆ Pưh, čar Gia Lai) mâo 804 čô hđeh. Mơ̆ng hdră ksiêm dlăng, ênoh hđeh hriăm hră ti sang hră hgŭm blei Ênua mdrao mgŭn knŏng mâo 80%. Nai mtô Trịnh Mạnh Thắng, khua sang hră brei thâo, kyua alŭ wăl mâo lu phung amĭ ama hđeh mă bruă kbưi, dŭm gŏ sang dleh dlan, phung hđeh jing mnuih djuê ƀiă lu lehanăn amĭ ama ka đei mđing kơ bruă blei Ênua mdrao mgŭn kơ phung anak čô:

“Thŭn anei, prăk Ênua mdrao mgŭn đĭ hĭn mkă hŏng thŭn hriăm êlâo, bruă duh mkra gŏ sang lu phung hđeh ti alŭ wăl tuôm hŏng lu klei dleh dlan. Sang hră ƀuh klei dleh dlan anăn lehanăn ăt ba mdah lu hdră msir, wăt ti mmông kƀĭn bi tuôm hŏng amĭ ama hđeh, sang hră bi tuôm leh hŏng phung amĭ ama mtô mblang kơ diñu thâo boh tŭ bruă blei Ênua mdrao mgŭn srăng ba wĭt klei tŭ jăk kơ phung hđeh lehanăn êpul êya”.

Hlăm ênoh 23 čô hđeh dôk hriăm ti kdriêk Čư̆ Pưh mâo 5 sang hră truh 90% ênoh hđeh blei Ênua mdrao mgŭn. Mta phŭn ngă kơ ênoh nao hgŭm hlăm ênua mdrao mgŭn ƀiă jing phung hđeh hriăm hră, sinh viên mâo knŭk kna mkăp hră ênua mdrao mgŭn hrŏ, hlăk să alŭ tlaih leh mơ̆ng krĭng dleh dlan. Nguyễn Hữu Hưng – K’iăng khua kriê dlăng Ênua yang ƀuôn kdriêk Čư̆ Pưh, čar Gia Lai brei thâo:

“Mnuih nao hgŭm blei Ênua mdrao mgŭn wưng êgao hrŏ lu, kyua hmăi mơ̆ng Klei bi mklă 612 (Klei bi mklă mơ̆ng Dhar bruă djuê ana) kơ bruă bi hrŏ krĭng, tlaih krĭng, kyua anăn phung hđeh ti krĭng anei hrŏ mơh, hlăm anăn êdah êdi jing phung hđeh mnuih djuê ƀiă. Kyua anăn, bruă nao hgŭm blei Ênua mdrao mgŭn mơ̆ng phung hđeh ti kdriêk Čư̆ Pưh knŏng mâo 81%.

Msĕ snăn, hnơ̆ng luôm bruă blei ênua mdrao mgŭn hlăm phung hđeh ti kdriêk Čư̆ Sê ăt tuôm hŏng lu klei dleh dlan. Khădah phung hđeh mnuih djuê ƀiă mâo ngăn prăk knŭk kna đru 60% ênoh tĭng blei ênua mdrao mgŭn ƀiădah truh ară anei ăt dôk hlăm brô 2.700 čô hđeh ka blei. Ngô Thị Hiền, K’iăng khua kriê dlăng Ênua yang ƀuôn kdriêk Čư̆ Sê. Čar Gia Lai brei thâo, hnơ̆ng luôm ênua mdrao mgŭn hlăm phung hđeh hriăm hră, sinh viên ti kdriêk knŏng mâo 86%.

“Anôk bruă kriê dlăng Sang hră, anôk bruă kđi čar ti să lehanăn anôk bruă ênua yang ƀuôn bi hgŭm nao truh ti grăp alŭ, ƀuôn lehanăn adŭ hriăm čiăng mtô mblang, mtrŭt mjhar ƀiădah phung amĭ ama hđeh wŏt lač diñu dôk tuôm hŏng klei dleh dlan ka dưi blei kơ phung anak. Khă snăn, thŭn hriăm 2023-2024, hmei đru kčĕ kơ Anôk bruă sang čư̆ êa kdriêk gĭt gai dŭm să, sang hră lehanăn anôk bruă mtô bi hriăm čiăng pŏk hdră ênua mdrao mgŭn kơ phung hđeh hriăm hră, sinh viên mâo truh 100% ênoh hđeh hgŭm.

Hluê klei ksiêm yap mơ̆ng Ênua yang ƀuôn čar Gia Lai, ară anei ênoh hđeh hriăm hră, sinh viên nao hgŭm blei ênua mdrao mgŭn knŏng mâo hlăm brô 90%. Čar adôk giăm 22 êbâo čô hđeh hriăm hră, sinh viên ka blei. Klei anei hmăi truh kơ klei tŭ dưi mơ̆ng phung hđeh tơdah amâo myun ruă duam čiăng ênoh bi liê lu hlăm hdră ksiêm mkă dlăng, mdrao klei ruă./.