VOV4.Êđê - Čar Gialai hlăk lŏ ngă lu hdră čiăng tlŏ vaccine gang mkhư̆ klei ruă tưp Covid 19 kơ hđeh mơ̆ng 5 truh kgŭ 12 thŭn. Čiăng kơ bruă tlŏ mgang mâo pŏk mlar truh hlăm grăp boh ƀuôn. Đinh Hà Nam, k’iăng khua knơ̆ng bruă mdrao mgŭn Gialai lač, ênoh hđeh mơ̆ng 5 truh kơ kgŭ 12 thŭn hlăm čar djăp klei găl tlŏ vaccine gang mkhư̆ klei ruă tưp Covid 19 jing êbeh 212 êbâo čô hđeh.

Yap truh kơ hrue 10/8, čar gialai mâo tlŏ leh êbeh 170 êbâo 700 hnơ̆ng vaccine aruăt tal 1, lehanăn êbeh 83 êbâo 700 hnơ̆ng, jing aruăt tal 2 kơ êpul hđeh anei, jing djăp aruăt tal 1 êbeh 80,46%, aruăt tal 2 jing 39,46%. Tui si Nam, hŏng ênoh mâo tlŏ anei, čar Gialai dôk leh tal 27 hlăm kluôm ala kơ bruă tlŏ vaccine kơ hđeh mơ̆ng 5 thŭn truh kgŭ 12 thŭn. Čiăng kơ bruă tlŏ mgang mâo ngă jăk hĭn hŏng phung hđeh, čar Gialai hlăk dôk gĭr, bi mguôp kjăp hŏng bruă hâo hưn, sang hră mơar mkŏ mjing klei mtrŭt mjhar, mđĭ ai amĭ ama phung hđeh, lehanăn mâo klei ksiêm, mtrŭt mjhar bruă tlŏ mgang hlăm nah gŭ./.

Y-Khem pô mblang