Jing sa hlăm dŭm čô guôn wăt yang hruê dơ̆ng čiăng mă hră mkă dlăng ală kơ ung ti akŏ  mmông mă bruă tlam, amai Yên Thị Sáng ti wăl krah Čư̆ Prông, kdriêk Čư̆ Prông brei thâo, hlăm wang 1 hruê kăm, wăt ung leh anăn 2 čô anak êkei amai bi ruă ală hrah. Mphŭn mâo, anak êkei kluč tưp mơ̆ng sang hră, amai čŏng blei êa drao mnăm leh anăn mdjah ală. Leh 1 hruê kăm, êjai anak hlao ƀiă, mmông anăn ung leh anăn anak êkei tal 2 lŏ ruă ală, kyuanăn amai ba nao mkă dlăng, hŏng klei hmăng hmưi srăng hlao hnưm hĭn:

 “Bi ĕ ruă ală mâo 1 hruê kăm, truh kơ ară anei dơ̆ng hlao leh, ĕ tal 2 ruă kjham, ama diñu aguah djŏ, tlam hlŏng hruê mkă dlăng ti sang êa drao. Ară anei mâo lu êdi mnuih ruă ală hrah”.

Hlăm wang êbeh sa mlan hŏng anei, dŭm sang êa drao ti čar Gia Lai čih yap mâo êbeh 3000 čô ruă ală hrah. Hlăm anăn mâo mkrah wah dưi mkă dlăng leh anăn mdrao ti dŭm sang êa drao thơ̆ng kơ bruă ti ƀuôn prŏng Pleiku. Kah knar, grăp hruê, grăp sang êa drao tŭ mă leh anăn mdrao kơ hlăm brô 50 čô ruă klă hrah, mâo hruê mâo 100 čô.

Kñăm ksiêm dlăng klei ruă ală hrah, anôk bruă ksiêm dlăng klei ruă tưp (CDC) Gia Lai mâo leh hră mơĭt kơ anôk bruă mdrao mgŭn 17 kdriêk, wăl krah, ƀuôn prŏng. Hluê anăn mtă kơ dŭm knơ̆ng bruă mdrao mgŭn mđĭ hĭn bruă hâo hưn, ktuê dlăng, hmao ƀuh hnưm leh anăn hmao mghaih msir dŭm anôk mâo klei ruă ti alŭ wăl. Thạc sĩ, êa mdrao thơ̆ng mdrao kơ ală Vũ Phương Việt Hằng – Anôk bruă ksiêm dlăng klei ruă tưp čar Gia Lai brei thâo: Phung ruă ală hrah jing phung hđeh sang hră dôk đĭ lu, kyuanăn, wăt phung amĭ ama, phung hđeh sang hră leh anăn sang hră mơar čiăng ksiêm dlăng klei ruă tưp lar:

 “Mâo dŭm klei mtă mdê hĭn. Anăn jing hlăm dŭm sang hră ênưih tưp lar hĭn. Êjai hđeh djŏ klei ruă, phung amĭ ama srăng brei anak dôk hlăm sang, amâo mâo tưp kơ hđeh mkăn. Tơdah hđeh ruă ală srăng ba nao mkă dlăng, amâo mâo čŏng duah blei êa drao mdjah, gang mkhư̆ klei klei amâo mâo jăk tam mâo hĕ”.

Klei ruă ală hrah kreh bluh mâo mơ̆ng 3 -7 hruê leh tuôm hŏng phŭn klei ruă. Klei bi êdah jing ală hrah, bĕ êa klă, mâo lu eh ală ( mâo eh ală mtah amâodah mtah – kñĭ kyua djŏ kman. Hlăm phung hđeh lŏ kreh mâo klei hdrăk, ruă kŏng đŏk, boh êlan bi êwa, êngoh. Phung ruă dưi tưp hŏng klei bi sô̆ hŏng êa ală, êa dŭng, ƀăng êgei, sô̆ hŏng mnuih ruă, mñir ală, mbĭt mbĭt mnơ̆ng hŏng mnuih ruă…

Čiăng gang mkhư̆ klei ruă ală hrah đĭ lar, grăp čô srăng bi hrŏ klei mñir ală, dŭng, ƀăng êgei. Amâo mâo bi sô̆ hŏng phung dôk mâo klei ruă. Rao kiê kngan jêñ jêñ hŏng kƀu amâodah êa drao mdiê kman. Yua mnal amâodah hmlei čiăng sut ală, leh anăn hwiê hlăm huôm djah čiăng amâo mâo tưp kơ gŏ sang leh anăn phung riêng gah, rao kngan hŏng êa drao mdjiê kman leh bi doh ală.