VOV4.Êđê- Hlăm wang sa mlan êgao, Sang êa drao mdrao kơ hđeh čar Gia Lai tŭ drông leh anăn mdrao kơ êbeh 800 čô hđeh mâo dŭm mta klei ruă êlan bi êwa, mâo 1/3 hlăm kluôm ênoh mnuih mâo klei ruă mơ̆ng akŏ thŭn truh kơ ară anei, Ti anôk mdrao mkluôm- Mdrao hŏng klei mdrao đưm ( sang Êa drao mdrao kơ hđeh čar Gia Lai) mâo 163 jhưng đih, ƀiădah ară anei dôk mdrao kơ êbeh 200 čô hđeh, kyuanăn lŏ dơ̆ng ba thiăm jhưng đih. Hlăm ênoh anăn mâo giăm 80% phung hđeh mâo dŭm mta klei ruă êlan bi êwa msĕ si: êngoh hdrăk, bŏk hlăm dŭng, bŏk hlăm kŏng đŏk, bŏk kđuč hlăm ksŏ…păt čiăng jih phung hđeh anăn ti gŭ 5 thŭn.

Aê mdrao Từ Thị Mai Linh, K’iăng khua kiă kriê sang êa drao mdrao kơ hđeh čar Gia Lai brei thâo. Yan anei hjan mđiă dleh thâo đăo knăl, jing klei găl kơ dŭm mta kman ngă klei ruă. Sang êa drao mprăp leh mnuih mă bruă, jưng đih mdrao čiăng kơ phung hđeh dưi đih mdrao djŏ hdră leh anăn mâo boh tŭ dưn. Mbĭt anăn lŏ mprăp ênŭm êa drao, mnơ̆ng yua djŏ tuôm hŏng bruă mdrao mgŭn klei ruă êlan bi êwa.

Pô mblang: Y-Ƀel Êban