VOV4.Êđê- Ară anei, dhar bruă mdrao mgŭn čar Gia Lai dôk hluê ngă lu hdră êlan gang mkhư̆ lu mta klei ruă tưp. Hlăm anăn huĭ hyưt hĭn jing klei ruă êngoh bi blĕ êrah, hŏng giăm 3000 čô mnuih ruă ti lu alŭ wăl mơ̆ng akŏ yan hjan truh kơ ară anei. klei ruă tưp Covid-19 dưi ksiêm dlăng leh, ƀiădah grăp hruê, dŭm anôk bruă mdrao mgŭn ăt čih yap mâo êbeh 10 čô mnuih ruă. Mbĭt hŏng anăn, dŭm mta klei ruă mkăn msĕ si buôr čuh akô̆ ƀăng đŏk, êngoh blĕ leh anăn čut kra ăt mâo klei tam mâo tơdah amâo dưi ksiêm dlăng kjăp.

Ti anăp klei huĭ hyưt klei ruă tưp lŏ mâo klei ruă tưp, bruă mdrao mgŭn čar Gia Lai dôk mtrŭt mđĭ bruă hâo hưn kơ mnuih ƀuôn sang ngă bruă mdjiê kman, bi doh wăl hdĭp čiăng bi hrŏ klei ruă êngoh bi blĕ êrah, bi kơ bruă tlŏ mgang, Gia Lai mĭn tĭng tlŏ bi leh 7000 aruăt vaccine buôr čuh akô̆ ƀăng đŏk kơ mnuih ƀuôn sang hlăm dŭm mlan ti anăp, bi hmar bruă tlŏ mgang vaccine klei ruă tưp Covid-19 kơ dŭm ênuk thŭn, boh nik phung hđeh dơ̆ng nao sang hră.

Čiăng bi hrŏ klei amâo mđing, ngă ngơi hlăm hdră gang mkhư̆ klei ruă Covid 19, Lâm Đồng dôk pŏk lu hdră msir, boh nik hdră tlŏ mgang kơ phung hđeh êlâo kơ mŭt hlăm thŭn hriăm mrâo. Ară anei, ti Lâm Đồng, mnuih êbeh 18 thŭn kơ dlông tlŏ leh aruăt vaccine Covid 19 tal 3 knŏng mâo 64,5%, aruăt tal 4 mâo 43,5%; aruăt lŏ mñă wĭt tal 3 kơ phung hđeh mơ̆ng 12 truh kơ gŭ 18 thŭn knŏng mâo êbeh 58%. Mta phŭn jing kyua lu mnuih mâo mđing, amâo čiăng lŏ ênŭm vaccine Covid 19 hluê si klei mtă mơ̆ng anôk bruă mdrao mgŭn. Čiăng kơ hdră gang mkhư̆ Covid 19 ba wĭt klei tŭ dưn, mđĭ ênoh mnuih tlŏ vaccine, čar Lâm Đồng dôk pŏk hdră tlŏ vaccine Covid 19 hlăm kluôm čar, mđing tlŏ bi leh aruăt tal 3 kơ phung hđeh mơ̆ng 12 truh kơ gŭ 18 thŭn êlâo kơ mŭt thŭn hriăm mrâo 2022­-2023./.

Pô mblang: Y-Ƀel Êban