VOV4.Êđê- Hlăm wưng êgao, ti čar Dak Lak kreh mâo klei mngăt hlăm êa ngă lu phung hđeh djiê. Anôk bruă djŏ tuôm pŏk ngă leh lu hdră kñăm bi hrŏ boh klei anei.

Hlăm hruê kăm êlâo, ti să Čư̆ Pơ̆ng, kdriêk Krông Ƀŭk, Dak Lak mâo klei hđeh mngăt hlăm êa pap mñai êdi ngă kơ 3 čô amai adei sa boh sang djiê. Pô prŏng mrâo 9 thŭn, điêt hĭn 5 thŭn. Amai Nguyễn Thị Loan, aprŏng phung hđeh yăl dliê:

“Yang hruê ƀuh amĭ ñu snăn pô prŏng akâo kơ amĭ ñu nao hlăp ti ênao êa siam ti tluôn anăn, amĭ ñu amâo ư ôh, bi huĭ nao ti êa djiê mngăt. Ñu hlŏng wơr hĕ mơh, leh mkrah mmông amâo lŏ ƀuh phung anak snăn kdjăt lŏ hdơr nao duah. Leh nao snăn adei kâo hdơr kơ ênao êa hlăk yang hruê anak akâo nao, truh tinăn snăn ƀuh jep phung anak snăn ƀuh dua čô đung ti êlan êa, pô êdei phung găp djuê đru dŏng hdĭp ƀiădah amâo dưi ôh.”

 Hlăm phung hđeh djiê anăn mâo 2 čô hđeh jing sang hră gưl sa Phạm Hồng Thái, să Čư̆ Pơng. Nai Vũ Thị Vân - Khua sang hră brei thâo, hlăm sang hră mâo ênao luê êa, mĭn tĭng yan mdei prŏng anei, leh klei ruă Covid-19 êdu ƀiă sang hră srăng pŏk adŭ mtô luê êa kơ hđeh sang hră. Phung hđeh mâo anăn hriăm luê êa, ƀiădah ka hmao hriăm ôh snăn tuôm hĕ hŏng klei truh.

“Tơdah klei ruă tưp êdu ƀiă snăn sang hră srăng mkŏ mjing adŭ hriăm luê êa kơ phung hđeh. Kơ phung klam bruă hđeh snăn hâo hưn nanao kơ phung hđeh kơ klei gang mkhư̆ djiê mngăt hlăm êa, klei truh čiăng răng mgang êđăp ênang kơ phung anak. Mơ̆ng êlâo truh ară anei sang hră ka mâo ôh klei truh ênguôt msĕ snăn, ênguôt snăk leh sa blư̆ luič hĕ dua čô hđeh kriăng hriăm leh anăn khăp snăk.”

Ênao Ea Dhung Tiêng, să Čư̆ Pơ̆ng, kdriêk Krông Ƀuk anôk 3 čô amai adei hlăm sa gŏ sang djiê mngăt hlăm hruê kăm êlâo

 Hlue si klei ksiêm yap mơ̆ng Knơ̆ng bruă mnuih mă bruă kahan êka êkeh leh anăn ala ƀuôn čar Dak Lak brei thâo, thŭn 2020 ti čar mâo 54 klei mngăt hlăm êa ngă kơ 73 čô hđeh djiê, ênoh anei mơ̆ng thŭn 2021 jing 48 klei hŏng 51 čô hđeh djiê mngăt hlăm êa. Hjăn dŭm hruê knhal jih mlan 3/2022 mrâo êgao mâo 2 klei djiê mngăt hlăm êa ngă kơ 5 čô hđeh djiê ti kdriêk Ea Sup leh anăn Krông Ƀuk.

Nguyễn Duy Tuyết –  Khua adŭ bruă đru kơ ala ƀuôn, Knơ̆ng bruă mnuih mă bruă kahan êka êkeh leh anăn ala ƀuôn Dak Lak brei thâo, hlăm dŭm thŭn hŏng anei, boh klei djiê mngăt hlăm êa ti Dak Lak mâo klei hrŏ, ƀiădah adôk lu, boh nik mâo lu klei djiê mngăt hlăm êa lu mnuih. Anôk bruă djŏ tuôm leh anăn dŭm alŭ wăl mâo nanao klei mtă kơ mnuih ƀuôn sang rơ̆ng êđăp ênang kơ hđeh, boh nik hlăm gưl mdei prŏng.

“Anôk bruă mnuih mă bruă kahan êka êkeh ala ƀuôn jing anôk bruă gĭt gai, bruă sang čư̆ êa alŭ wăl ti kdriêk, să brei hâo hn kơ phung amĭ ama, amâodah phung răng mgang phung hđeh brei ktuê dlăng phung hđeh ti sang, amâo brei phung hđeh hiu hjăn păn ôh ti dŭm anôk giăm êa krông, êa hnoh, ênao êa huĭ hyưt.”

Anôk bruă ti alŭ wăl nao mđĭ ai, bi juh leh anăn mđup brei 130 êklăk prăk kơ gŏ sang mâo 3 čô anak djiê mngăt hlăm êa ti să Čư̆ Pơ̆ng, kdriêk Krông Ƀuk, čar Dak Lak.

 Lač kơ hdră gang mkhư̆ klei hđeh djiê mngăt hlăm êa, Đỗ Tường Hiệp- K’iăng Khua Knơ̆ng bruă sang hră - mtô bi hriăm Dak Lak hâo hưn.

“Knơ̆ng bruă sang hră mtô bi hriăm čar gĭt gai dŭm boh sang hră pral bi hriăm klei thâo hdĭp, gang mkhư̆ klei djiê mngăt hlăm êa kơ hđeh, jao kơ phung nai bi hriăm klei mjuăt ktang asei mlei nao hriăm mjuăt kơ klei mtô luê êa kơ hđeh sang hră. Mkŏ mjing hnơ̆ng kčah gang mkhư̆ klei truh kơ hđeh hlăm anăn mâo klei djiê mngăt hlăm êa ti dŭm sang hră, gĭr truh thŭn 2030 snăn hrŏ 10% klei hđeh djiê mngăt hlăm êa, truh 2025 snăn 50% ênoh hđeh ti čar Dak Lak thâo luê êa.”

 Sĭt jih gŏ sang, sang hră leh anăn kluôm ala ƀuôn hrăm mbĭt bi thâo săng gang mkhư̆ klei truh jhat kơ hđeh hlăm anăn mâo klei djiê mngăt hlăm êa, čang hmăng hlăm wưng kơ anăp ti Dak Lak amâo srăng lŏ mâo ôh klei ênguôt hđeh djiê mngăt hlăm êa./.

Pô mblang: H’Zawut Ƀuôn Yă