VOV4.Êđê - Ti čar Dak Lak, ară anei ênoh mnuih djŏ Cpvid-19 dôk đĭ pral hŏng êbeh 4000 čô hlăm grăp hruê. Klei anei mjing klei kpĭ prŏng kơ êpul ngă bruă mdrao mgŭn. Mơ̆ng leh Phŭn bruă mdrao mgŭn mâo hdră kčah, ktrâo lač kơ bruă mdrao phung F0 ti sang, hŏng bruă ba yua hla pŏk web ala ƀuôn, bruă kriê dlăng, mdrao phung djŏ Covid-19 jing hdjul hĭn, êpul aê mdrao đru mnuih ruă dưi mdrao hlăm dŭm êpul chat Zalo mâo klei tŭ dưn.

Knhal jih mlan 1 leh êgao, amai N.T.P ti ƀuôn hgŭm Êa Tam, ƀuôn prŏng Ƀuôn Ama Thuôt djŏ kman Sar CoV2. Leh hưn mthâo hŏng anôk bruă mdrao mgŭn lehanăn ngă hră akâo dŏng mdrao ti sang, amai N.T.P mâo ktrâo lač mŭt hlăm Êpul Zalo kơ phung F0 mdrao ti sang hlăm alŭ wăl ƀuôn hgŭm Êa Tam. Ƀuh anei jing bruă ngă klă sĭt, jăk găl kơ hdră mdrao F0 ti sang, amai N.T.P tŭ ư nao hgŭm. Ami amai N.T.P yăl dliê hlăk nao mŭt hlăm êpul anei snei: “Hlăm wưng knhal jih mlan 1, kâo mâo ktrâo lač kơ hdră bi ktlah, mdrao ti sang tơdah mâo djăp klei găl hluê si klei kčah mtrŭn lehanăn boh nik mâo klei đru mơ̆ng Êpul Zalo mdrao phung F0. Leh nao hgŭm hlăm êpul, mâo dŭm êtuh čô, mâo wăt phung knuă druh mdrao mgŭn, mnuih ruă lehanăn mnuih hlao. Hlăm wưng bi ktlah dôk mdrao, bruă nao hgŭm hlăm êpul Zalo đru kơ kâo amâo lŏ rŭng răng, kyua grăp hruê hruê dôk hlăm adŭ đih mtih djiêu gah găn. Tĭng hŏng bruă nao mdrao bi ktlah sa anôk msĕ êlâo, kâo ƀuh mdrao ti sang lehanăn mâo klei đru kčĕ mơ̆ng êpul knuă druh mdrao mgŭn hluê êlan hla pŏk web yang ƀuôn, amâo djŏ knŏng đru kơ mnuih ruă Covid 19 ƀiădah kâo ƀuh ai tiê ăt jăk hĭn mơh”.

Hluê si aê mdrao Ngô Mạnh Cường, Khua anôk bruă mdrao mgŭn ƀuôn hgŭm Êa Tam, ƀuôn prŏng Ƀuôn Ama Thuôt, kbiă hriê mơ̆ng mnuih ruă Covid 19 mâo klei bi êdah hdjul lehanăn mnuih mă bruă dŏng mdrao mơ̆ng anôk bruă mdrao mgŭn kƀah mơh kyua anăn lu phung F0 akâo mdrao ti sang. Khă snăn, kyua êpul mă bruă mdrao mgŭn alŭ wăl ƀiă, amâo dưi nao truh ti grăp gŏ sang đru kơ mnuih ruă kyua anăn êpul êya ba yua leh hla pŏk web yang ƀuôn mkăp kơ hdră kriê dlăng, dŏng mdrao, hlăm anăn mkŏ mjing leh êpul Zalo. Êpul anei mâo anôk bruă mdrao mgŭn lehanăn phung knuă druh bruă mdrao mgŭn kriê dlăng, hluê ngă bruă, ktrâo lač lehañ hlak mblang dŭm klei mđing uêñ mơ̆ng phung F0 mdrao ti sang. Anei amâo djŏ jing hdră mtô mblang jăk êdi mơ̆ng anôk bruă mdrao mgŭn ƀiădah lŏ jing anôk čiăng kơ phung ruă Covid 19 bi trông, hưn mthâo klei dleh dlan, mtrŭt mđĭ ai, bi h’ĭt ai tiê, bi hrŏ klei hmăi amâo mâo jăk truh kơ wưng leh hlao klei ruă Covid 19. Aê mdrao Ngô Mạnh Cường brei thâo: “Ară anei ƀuôn hgŭm Êa Tam mâo hlăm brô 1.300 truh 1.400 čô F0 mdrao ti sang. Hŏng ênoh mnuih ruă lu msĕ ară anei amâo mâo zalo snăn amâo thâo čiăng bĕ dŭm čpp knuă druh dưi kriê dlăng, kyua bruă mă lu êdi msĕ si ksiêm dlăng klei êngoh hlơr, mtŭk, dleh bi êwa, ruă đah da, mkă hnơ̆ng oxi hlăm êrah (Spo2), ktrâo lač lehanăn ksiêm dlăng klei bi êdah ktrŏ čiăng hưn mthâo hŏng anôk mdrao mgŭn... Mơ̆ng kdrăp zalo, mnuih ruă dưi hưn mthâo klei suaih pral hlăm grăp hruê kơ anôk bruă mdrao mgŭn lehanăn knuă druh ktuê ksiêm ,dŏng mdrao.

Aê mdrao Cường lač bruă ba yua kdrăp mrâo 4.0 hlăm bruă kriê dlăng, mdrao phung ruă Covid 19 jăk găl êdi. Si tô hmô, hŏng mnuih nao mă bruă čiăng mâo hră m’ar bi mklă kñăm msir mghaih klei mdei bruă dưi dưn ênua yang ƀuôn, bi hrô hŏng bruă brei bi mklă hdră mdrao ti sang hŏng grăp čô mnuih ruă snăn phung knuă druh knŏng ba dưm hlăm êpul zalo snăn dŭm êtuh čô ruă dưi mă s’aĭ, amâo luič hruê mmông nao. Phung ruă mâo klei bi êdah amâo jăk knŏng hưn mthâo hlăm êpul zalo amâo dah hưn kơ phung knuă druh mă bruă mdrao mgŭn srăng mâo mtam klei đru nao ksiêm mkă. Dŭm bruă anei mơ̆ng hla pŏk web yang ƀuôn dôk ba wĭt klei tŭ dưn êdi kơ hdră gang mkhư̆ Covid 19, bi hrŏ klei ktrŏ kơ anôk bruă mdrao mgŭn nah gŭ.

Hluê si aê mdrao Lại Quang Miễn, K’iăng khua anôk bruă mdrao mgŭn ƀuôn prŏng Ƀuôn Ama Thuôt, ênoh F0 đĭ pral hlăm sa wưng bhiâo ba lu klei ktrŏ kơ anôk bruă mdrao mgŭn, kyua anăn bruă brei phung F0 mâo klei bi êdah ruă hdjul mdrao ti sang jing djŏ guôp. Khă snăn, phung F0 anei amâo thâo ôh si klei bi knăl ktrŏ čiăng pral ba dŏng mdrao huĭ srăng hmăi truh kơ klei suaih pral. Kyua anăn, bruă ba yua êpul Zalo hlak mblang klei êmuh kơ dŭm klei bi knăl ruă, hdră mdrao, ba yua êa drao djŏ hdră srăng ba wĭt klei h’ĭt ai tiê kơ mnuih ruă. Hưn lač kơ boh tŭ hlăk mkŏ mjing Zalo đru kơ phung F0 mdrao ti sang. Aê mdrao Lại Quang Miễn brei thâo: Čiăng jăk găl kơ bruă mdrao F0 ti sang, anôk bruă mdrao mgŭn mkŏ mjing leh Zalo chat. Êpul anei mâo lu klei tŭ dưn, tal êlâo hĭn jing pral tŭ mă hră m’ar ktrâo lač mơ̆ng gưl dlông. Tal 2 jing bi trông thơ̆ng kơ bruă dŏng mdrao. Tal 3 jing ba yua êa drao djŏ guôp, êđăp ênang lehanăn tŭ dưn. Êpul anei ăt mâo ksiêk kjăp knŏng dưi bi trông kơ hdră mdrao amâo dưi bi trông kơ kleimkăn. Ară anei, êpul anei dưi pŏk ngă ti 25 anôk bruă mdrao mgŭn, hlăm anăn mâo 21anôk mdrao mgŭn să, ƀuôn hgŭm lehanăn 4 anôk mdrao mgŭn êngao knŭk kna.

Dưi lač, bruă ba yua hla pŏk web yang ƀuôn hlăm hdră mdrao F0 ti sang đru mguôp yuôm bhăn hlăm bruă bi hrŏ klei ktrŏ kơ anôk bruă mdrao mgŭn mbĭt anăn bi h’ĭt ai tiê kơ mnuih ruă. Čang hmăng, hlăm wưng ti anăp, bruă ba yua internet lehanăn hla pŏk web yang ƀuôn srăng dưi mđĭ lar hlăm hdră gang mkhư̆ klei ruă Covid 19, mơ̆ng anăn, êpul knuă druh, mnuih mă bruă mdrao mgŭn srăng lŏ mâo mmông lehanăn klei găl mđing hluê ngă jăk hĭn bruă klam dlăng kriê klei suaih pral kơ mnuih ruă ktrŏ mkăn./.