Anôk bruă mdrao mgŭn Dak Lak ară anei mâo êbeh 6.660 čô knuă druh, mnuih mă bruă, hlăm anăn mâo 20,5% čô knuă druh, nai aê mdrao mâo hnơ̆ng hriăm gưl prŏng lehanăn êdei kơ gưl prŏng. Kluôm čar mâo 92,3% anôk bruă mdrao mgŭn mâo phung aê mdrao lehanăn 100% anôk bruă mdrao mgŭn dưi mprăp maĭtĭng dưi mkŏ hŏng êlan mạng, ba yua phần mềm kriê dlăng bruă mdrao mgŭn. Boh nik, anôk bruă mdrao mgŭn să mâo djăp Hdruôm hnơ̆ng čuăn ala čar truh kơ wưng thŭn 2030 êgao leh hnơ̆ng kčah mtrŭn.

Ti anăp klei lông dlăng mơ̆ng klei ruă tưp huĭ hyưt msĕ si Hdrak A H1N1, Ebola, MERS-CoV, SARS boh nik COVID-19, anôk bruă mdrao mgŭn čar Dak Lak bi hgŭm leh kjăp hŏng dŭm anôk bruă, êpul êya, pŏk ngă kjăp dŭm hdră msir gang mkhư̆ tŭ dưn. Mkăp djŏ hŏng hdră dlăng kriê klei suaih pral ƀrư̆ hruê ƀrư̆ đĭ mơ̆ng mnuih ƀuôn sang, anôk bruă mdrao mgŭn Dak Lak pral ba yua dŭm kdrăp mdrao mgŭn mrâo mrang msĕ si kdrăp mrâo hlăm hdră mdrao kboh, bi êran boh bleh, hdră mblač nội soi, kñăm bi hrŏ klei nao mdrao lu kơ gưl dlông. Hŏng dŭm boh tŭ dưi mâo, anôk bruă mdrao mgŭn Dak Lak dưi jao leh Medai ngă bruă dŭm mta, Hla čhiăm gru bi ktưn êdah kdlưn, mbĭt hŏng lu Hră pah mni mơ̆ng Khua knŭk kna; Phŭn bruă mdrao mgŭn; Lu phung nai aê mdrao dưi bi mni…/.