Hlăm sa hruê myơr êrah kyua Êpul hgŭm mnuih mă bruă čar Lâm Đồng bi hgŭm hŏng Êpul hgŭm gru bi kal hrah čar mkŏ mjing ti Đà Lạt, amai Phạm Thị Hồng, sa čô mnuih mă bruă hlăm bruă mtô bi hriăm brei thâo: anei jing bruă ngă yuôm bhăn kyua anăn brei dưi mđĭ lar leh anăn mkŏ mjing jêñ jêñ hĭn, iêô jak lu mnuih hlăm ala ƀuôn hgŭm.

“Hlăk mâo klei hưn mthâo mâo knăm mơak myơr êrah tinei snăn ayŏng adei nai mtô ti sang hră čŏng nao hgŭm, myơr êrah hlăm ai tiê hơ̆k mơak. Pô bi mĭn jing đru mguôp sa kdrêč điêt kơ ala ƀuôn snăn ƀuh mơak hĭn.”

Nguyễn Tấn Chờ myơr leh êrah 48 blư̆

 Anei jing sa hlăm dŭm bruă ngă êdah êdi dôk hlăm hdră bi hgŭm plah wah Êpul hgŭm mnuih mă bruă čar leh anăn Êpul hgŭm gru bi kal hrah Lâm Đồng wưng thŭn 2019-2023 kñăm lŏ dơ̆ng mđĭ lar knhuah gru myơr êrah pioh kơ hdră dŏng mdrao, gang mkhư̆ hlăm dŭm klei mjêč leh anăn ngă djŏ hlăm hdră dŏng mdrao phung ruă.

Mrâo anei, Anôk bruă myơr êrah čar Gia Lai mkŏ mjing klei bi kƀĭn ksiêm wĭt bruă myơr êrah thŭn 2022, pŏk ngă hdră kčah thŭn 2023. Hlue si klei hưn mdah, thŭn anei kluôm čar Gia Lai mkŏ mjing pŏk ngă leh 84 gưl myơr êrah, boh tŭ mâo êbeh 18 êbâo ênoh êrah doh, mâo 120% hnơ̆ng kčah hdră dưi jao. Hlăm anăn, Sang êa drao prŏng čar Gia Lai tŭ yao êbeh 14.600 ênoh êrah leh anăn Sang êa drao lĭng kahan 211 mâo mă êbeh 3300 ênoh êrah doh. Mâo 416 ênoh êrah mjêč dưi hmao mkăp kơ dŭm anôk mdrao mgŭn čiăng mdrao mnuih ruă. Dương Đình Diện- K’iăng Khua anôk bruă gĭt gai mtrŭt mjhar myơr êrah, Khua Êpul hgŭm gru bi kal hrah čar Gia Lai, brei thâo:

“Thŭn 2022 hŏng klei gĭt gai mơ̆ng Knơ̆ng bruă sang čư̆ êa čar ăt msĕ mơh Anôk bruă gĭt gai mtrŭt mjhar êrah čar snăn klei lar bra hlăm hdră myơr êrah dưi lar hlăm mnuih ƀuôn sang leh anăn ƀrư̆ iêô jak lu mnuih ƀuôn sang hgŭm hlăm hdră myơr êrah. Hmei bi mklă dŭm hruê kơ anăp snăn gĭr bi lar bruă ngă ba klei khăp, myơr êrah đru mnuih čiăng kơ êpul êya mnuih ƀuôn sang gĭr hgŭm hlăm hdră myơr êrah hlăm wưng kơ anăp”.

 Ti Dak Lak, Anôk bruă gĭt gai klei myơr êrah čar ăt mkŏ mjing Klei bi kƀĭn mpŭ kơ phung myơr êrah kdlưn hĭn thŭn 2022. 52 čô kdlưn hĭn hlăm hdră myơr êrag dưi mpŭ mni hlăm gưl anei. Anei jing phung nao myơr êrah lu blư̆ hlăm thŭn 2020 leh anăn 2021. Nguyễn Tấn Chờ, kkiêng thŭn 1967, ti alŭ Tiến Thịnh, să Quảng Tiến, kdriêk čư̆ Mgar, čar Dak Lak mâo leh 48 blư̆ myơr êrah lač:

“Pô ƀuh brei pô ngă sa mta klei čiăng đru kơ phung amâo myun hlăm klei hdĭp. Truh ară anei pô ăt myơr leh êrah 48 blư̆ leh anăn ăt cih anăn myơr asei mlei čiăng êdei anei tơdah pô djiê hĕ ăt mâo mơh mnơ̆ng đru kơ klei hdĭp, kơ pô mkăn. Phung hlăm gŏ sang kâo ăt nao myơr êrah leh anăn kâo čiăng mơĭt kơ grăp čô mnuih, đăm bi mĭn soh čhuai ôh kơ klei myơr êrah amâo jăk kơ asei mlei, ƀiădah jing pô đru mnuih, tal dua đru pô bi mlih êrah, asei mlei suaih hĭn.”

Sa hruê myơr êrah ti Lâm Đồng

Dak Lak jing sa hlăm pluh čar ba anăp hlăm kluôm ala kơ klei myơr êrah kơ hdră čŏng myơr êrah. Čar ară anei mâo 200 Anôk bruă gĭt gai myơr êrah dŭm gưl, 8 êpul hgŭm myơr êrah leh anăn mkăp myơr êrah… Kah knar grăp čar mâo hlăm brô 30 êbâo čô mnuih čih anăn myơr êrah, tŭ mă êbeh 20 êbâo ênoh êrah doh.

H’Yim Kđoh,  K’iăng Khua Knơ̆ng bruă Sang čư̆ êa čar, Khua Anôk bruă myơr êrah čar Dak lak lač, dưi mâo klei tŭ anei jing kyua klei ngă bruă mơ̆ng phung hlăm Anôk bruă gĭt gai myơr êrah dŭm gưl, alŭ wăl leh anăn bruă ngă jăk siam mơ̆ng phung čŏng myơr.

“Hlăm wưng kơ anăp lŏ dơ̆ng iêô mthưr lu mnuih hgŭm myơr êrah hĭn, leh anăn čang hmăng jih hang phung suaih pral mâo klei kah mbha hŏng phung ruă. Anei ăt jing klei čang hmăng kơ jih jang phung ruă leh anăn drei đăo knang hŏng klei gĭr jih ai tiê mơ̆ng bruă kđi čar hŏng jih jang dŭm djuê ana hlăm čar Dak Lak srăng mâo lu klei găl mbŏ êrah hĭn kơ phung ruă čiăng kơ mnuih ruă mâo sa klei hdĭp mrâo jăk hĭn”.

 Mrâo anei, ti ƀuôn prŏng Ƀuôn Ama Thuôt ăt mkŏ mjing leh Knăm hưn mdah Êpul hgŭm myơr êrah hin RH- čar Dak Lak. Êpul hgĭm mâo 3 êpul hŏng 43 čô, anei jing phung mâo êrah RH-, hlăm êpul êrah hin. Anei jing anôk bi kƀin, bi hgŭm phung myơr êrah čiăng mkŏ mjing êpul mâo êrah mkăp, mjing phŭn mâo êrah hĭn đru myơr êrah doh./.