VOV4.Êđê - Tlam mbruê, Khua lăn čar Nguyễn Xuân Phúc nao leh hlăm knăm bi hdơr 50 thŭn hruê mkŏ mjing knơ̆ng bruă êa drao Việt Nam leh anăn mđup brei mêđai mă bruă mrô 1 kơ knơ̆ng bruă. Bi ala kơ Đảng, knŭk kna, Khua lăn čar čih yap, yap yuôm bhăn, pah mni dŭm bpoh tŭ mơ̆ng knơ̆ng bruă êa drao Việt Nam leh anăn dŭm knơ̆ng bruă hgŭm hlăm êbeh 50 thŭn êgao, đru mđĭ kyar bruă mkra mjing êa drao Việt Nam leh anăn bruă kriê dlăng, răng mgang klei suiah pral mnuih ƀuôn sang. Êdah êdi jing dŭm klei đru mguôp bi hơĭt ênoh êa drao, rơ̆ng lu jơr, dŭm mta, ênoh, hnơ̆ng tŭ jăk êa drao leh anăn bi kna klei čiăng kơ êa drao gang mkhư̆, mdrao klei ruă mơ̆ng mnuih ƀuôn sang, ngă jăk bruă klam dưi jao bruă mkăp pioh, mnia mblei êa drao ala čar. Ti anăp boh klei lu anôk bruă mdrao mgŭn hlăm kluôm ala kƀah hin êa drao leh anăn kdrăp yua bruă mdrao mgŭn, Khua lăn čar Nguyễn Xuân Phúc mtă kơ knŭk kna leh anăn Dhar bruă mdrao mgŭn čiăng hnưm mgaih msir boh klei anei. Khua lăn čar lač klă, mâo 41 čar, ƀuôn prŏng kƀah hin êa drao, kdrăp yua bruă mdrao mgŭn.

Y-Ƀel pô mblang