VOV4.Êđê- Hrue mbrue (4/8), aduôn Đào Hồng Lan, Khua phŭn bruă mdrao mgŭn jing jai, nga khua êpul mâo leh mmông mă bruă hŏng čar Daklak. Tui si klei hâo mdah, hlăm dŭm thŭn êgao, bruă mkă dlăng mdrao mgŭn hlăm čar mâo leh dŭm klei bi mlih jăk, sang êa drao, kdrăp mdrao mgŭn mâo mđĭ kyar, lehanăn dưi ksiêm dlăng jih jang klei ruă mơ̆ng nah gŭ mtam. Kơ bruă mdrơ̆ng hŏng klei ruă tưp, ară anei čar Daklak dôk mâo truh giăm 40 mta klei ruă tưp, hlăm anăn mâo leh 10 mta klei ruă hrŏ hĭn leh, 2 mta klei ruă hlăk đĭ, 27 mta klei ruă hơĭt leh mkă hŏng wưng anei thŭn dih.

Hlăm anăn, dua mta klei ruă dôk đĭ lar jing klei ruă tưp Covid 19 lehanăn klei ruă êngoh bi ƀlĕ êrah. Blŭ hrăm ti anôk mă bruă, Đào Hồng Lan khua phŭn bruă mdrao mgŭn jing jai lač, klei ruă tưp hlăk hlê dleh thâo tĭng knăl, kyuanăn čar lŏ dơ̆ng kiă kriê kjăp halwm bruă gang mkhư̆, đăm lui ôh tơl klei ruă tưp mđĭ mđăl lu mta. Kơ bruă tlŏ vaccine Covid 19, čar Daklak hlăk jing sa hlăm 4 boh čar mâo ênoh mnuih lŏ tlŏ aruăt mñă ƀiă hĭn hlăm kluôm ala, kyua anăn čar năng lŏ mđĭ hĭn bruă hâo hưn, čiăng kơ phung ƀuôn sang sa ai bi nao tlŏ mgang./.

Pô mblang: Y-Khem Niê