Anei jing gưl tal êlâo Knăm pah mni phung mniê hriăm lu mă bruă mdrao mgŭn dưi mkŏ mjing, kñăm čih yap dŭm klei đru mguôp hur har leh anăn tŭ dưn mơ̆ng grăp čô êdah êdi hlăm klei mđĭ kyar bruă duh mkra ala ƀuôn leh anăn bruă gang mkhư̆ klei ruă tưp Covid-19. Hlăm 51 čô phung mniê hriăm lu mă bruă mdrao mgŭn dưi pah mni hlăm gưl anei, mâo 1 čô nai prŏng, 15 čô k’iăng nai prŏng, 17 čô nai prĭn, 1 čô Thạc Sỹ leh anăn 1 čô nai êa drao.

Blŭ hlăm knăm anăn, k’iăng Khua knŭk kna Trần Hồng Hà yap yuôm bhăn dŭm klei đru mguôp hlăm bruă kriê dlăng klei suiah pral mnuih ƀuôn sang mơ̆ng phung mniê hriăm lu mă bruă mdrao mgŭn, hlăm anăn mâo 51 čô êdah êdi dưi pah mni hlăm gưl anei. Boh nik, hlăm êbeh 3 thŭn gang mkhư̆ klei ruă tưp Covid-19, lu phung mniê hriăm lu mă bruă mdrao mgŭn amâo mâo mdei klei đru mguôp, ksiêm duah klei kreh knhâo, amâo mâo uêñ kơ klei dleh dlan, arưp aram, nao ti anôk mâo klei ruă čiăng đru, mâo dŭm klei kčĕ klă klơ̆ng, mơ̆ng anăn bi mdrơ̆ng tŭ dưn hŏng klei ruă tưp.