Hluê si klei tĭng mkă mơ̆ng anôk bruă ksiêm dlăng klei ruă tưp čar Dak Lak, mơ̆ng akŏ thŭn truh kơ ară anei, kluôm čar mâo giăm 1 êbâo čô mâo klei ruă êngoh bi blĕ êra, hlăm anăn mâo 1 čô djiê. Ênoh phung djŏ klei ruă anei mơ̆ng akŏ mlan 7 truh kơ ară anei jing giăm 500 čô, knar hŏng ênoh mnuih ruă ti alŭ wăl hlăm 6 mlan akŏ thŭn.

Hlăm anăn mâo lu mnuih ruă nao đih sang êa drao hlăm klei ruă kjham, mâo klei bi knăl hưn brei răng. Tlâo alŭ wăl mâo ênoh mnuih mâo klei ruă lu hĭn jing kdriêk Ea H’Leo, kdriêk Ea Kar leh anăn ƀuôn prŏng Ƀuôn Ama Thuôt. Hoàng Hải Phúc, k’iăng khua kiă kriê anôk bruă ksiêm dlăng klei ruă tưp čar Dak Lak brei thâo, phŭn agha ngă truh klei bluh đĭ klei ruă êngoh bi blĕ êrah kyua mnuih ƀuôn sang dôk ngă ngơi mang hlăm bruă gang mkhư̆. Êjai djŏ klei ruă čŏng duah blei êa drao leh anăn mdrao ti sang, ngă kơ lu mnuih ruă đĭ kjham, klei arưp aram truh kơ klei djiê ktang.