Hluê si anôk bruă ksiêm dlăng klei ruă tưp čar Gia Lai, mơ̆ng akŏ thŭn truh kơ ară anei, hlăm čar mâo 1400 čô djŏ klei ruă hŏng 507 anôk mâo klei ruă. Ênoh phung mâo klei ruă đĭ lu mơ̆ng mlan 5 leh anăn truh kơ ară anei kyua mŭt hlăm yan hjan jing klei găl kơ kêč ƀloh đĭ lar. Ară anei dôk hlăm brô 80 anôk mâo klei ruă ka dưi mgaih msir.

Anôk bruă ksiêm dlăng klei ruă tưp čar Gia Lai mkŏ mjing leh êpul ngă bruă bi mguôp hŏng dŭm kdriêk gĭt gai ktang phĭt bruă gang mkhư̆ leh anăn msưh kdŭn klei ruă êngoh bi blĕ êrah. Bi mguôp hŏng dŭm kdriêk mtô lač kơ mnuih ƀuôn sang, boh nik dŭm să mâo lu anôk ruă čŏng bi doh wăl hdĭp msĕ si tuh hĕ êa hlăm mnơ̆ng thâo mgơ̆ng êa, bi doh wăl hdĭp mda. Bi mguôp hŏng anôk bruă mdrao mgŭn kdriêk mgaih msir dŭm anôk mâo klei ruă, amâo mâo brei klei ruă đĭ lar.