VOV4.Êđê - Boh klei ruă êngoh bi ƀlĕ êrah ti čar Dak Lak dôk mâo dleh ktuê dlăng, ênoh mnuih ruă kjham leh anăn djiê đĭ nanao, Sang êa drao krĭng Lăn Dap Kngư dôk ti anăp lu êgao hnơ̆ng.

Leh 6 hruê amâo hdơr êa êpa êsei kyua klei ruă êngoh bi ƀlĕ êrah, aduôn Mạc Thị Pun, kkiêng thŭn 1955, alŭ Êa K’raĭ, să Dliê Ya, kdriêk Krông H’Nang lŏ hdơr. Ñu yăl dliê, hruê 9/8 ñu êngoh, asei mlei êgah êgăn kyua anăn mâo gŏ sang bao nao kơ sang êa drao kdriêk ksiêm mkă dlăng. Leh 2 hruê kăm đih mdrao, ti tian ñu buh lu anôk brăm jŭ lehanăn amâo lŏ hdơr êa êpa êsei ôh, ñu dưi ba nao kơ Sang êa drao prŏng krĭng Lăn dap kngư: “Knŏng thâo kâo gơ̆ mtŭk lehanăn dưi ba nao ti sang êa drao, êdei kơnăn ba tinei lehanăn amâo lŏ thâo ôh. Ară anei dôk ruă hlăm tian đuič, bi êwa dưi leh mơh, lŏ suaih ƀiă leh. Mơ̆ng mbruê truh kơ ară anei, mnăm êa boh kruê̆, huă ƀơ̆ng leh. Ară anei, kâo lač jăk kơ phung aê mdrao dŏng hdĭp leh kâo”.

Ti djiêu jhưng đih Mạc Thị Pun, aduôn H’Ñet Ƀuôn Tô, ti să Êa Ktur, kdriêk Čư̆ Kuiñ, dôk mkra klei truyền tiểu cầu kơ anak pô jing Y-Hông Buôn Tô. Aduôn H’Ñet brei thâo, Y-Hông mâo klei ruă hlăm êrah dơ̆ng mơ̆ng tian amĭ. Hlăm brô 10 hruê êlâo, ƀuh anak êngoh, ruă tian, ñu ba nao ti sang êa drao prŏng krĭng lăn dap kngư. Leh 1 hruê kăm dŏng mdrao, truh kơ ară anei, Y-Hông ƀrư̆ suaih pral leh. Aduôn H’Ñet brei thâo: “Êngoh hlơr m’ai, 3 hruê mkă 38 -39 độ nanao, snăn nanao amâo trŭn ôh. Ƀuh ñu nao tlô kbiă êrah, ƀuh êrah ñu huĭ hlŏng êbuh tinăn, kâo hlŏng êbuh hĕ mơh. Huĭ hyưt êdi, tơdah amâo pral thâo, klei ruă anei đĭ kơ kjham, huĭ srăng truh kơ djiê.

Aê mdrao H’Noen Hđơ̆k, Adŭ mdrao klei ruă tưp, Sang êa drao prŏng krĭng lăn dap kngư brei thâo, ară anei adŭ mdrao dôk dŏng mdrao kơ giăm 100 čô mâo klei ruă êngoh bi ƀlĕ êrah. “Dôk mdrao ti Adŭ mdrao anei lu jing mnuih ruă êngoh bi ƀlĕ êrah dengue huĭ srăng đĭ kơ kjham, bi mnuih ruă ktrŏ leh snăn hmei mâo leh hdră mdrao bi hrŏ klei đĭ kơ kjham hĭn; leh 2h pô lŏ tĭng dlăng snăn ƀuh mnuih ruă dưi ƀiă, srăng brei dôk đih mdrao ti sang, bi tơdah klei ruă lŏ đĭ kơ kjham hĭn, hmei srăng ba mdrao ti adŭ dŏng mdrao mjêč lŏ krŭ wĭt ai suaih pral. Mơ̆ng akŏ mlan 8 truh kơ ară anei, hmei ba nao leh kơ adŭ dŏng mdrao mjêč 5 čô ruă.

Hluê Aê mdrao Phạm Hồng Lâm, khua Adŭ mdrao klei ruă tưp, Sang êa drao prŏng krĭng lăn dap kngư, mơ̆ng akŏ thŭn truh kơ ară anei, adŭ bruă dŏng mdrao leh êbeh 500 čô ruă êngoh bi ƀlĕ êrah. Klei năng mđing, ênoh mnuih ruă kjham đĭ lu mơ̆ng akŏ mlan 8 truh kơ ară anei. Mnuih ruă đih mdrao lu ngă kơ hdră dŏng mdrao mnuih ruă gơ̆ lu đei. “Boh nik thŭn anei ênoh mnuih ruă kjham lehanăn huĭ srăng đĭ kơ kjham mâo lu êdi. Ti anăp mâo lu mnuih ruă lehanăn lu mta kman klei ruă snăn Sang êa drao prŏng krĭng Lăn dap kngư ăt tuôm hŏng lu klei dleh dlan. Boh nik, mnuih mă bruă kƀah mơh, ară anei adŭ mdrao hmei lŏ mâo 3 čô đru bruă aê mdrao, 2 čô aê mdrao ti dŭm adŭ mdrao mkăn snăn mâo mơ̆ng 20 – 22 čô, djŏ mmông truh 150 čô ruă, sa čô mă bruă msĕ 3 čô, ênoh jhưng đih lehanăn adŭ mdrao jih mơh, đa đa đih ti nah êngao, đih hlăm jhưng klăp.

Hoàng Hải Phúc, K’iăng khua anôk bruă ksiêm dlăng klei ruă tưp čar Dak Lak brei thâo: Klei ruă êngoh bi ƀlĕ êrah ti alŭ wăl čar dôk mâo dleh dưi ksiêm dlăng. Tĭng truh hruê 16/8, kluôm čar mâo leh giăm 3.500 čô djŏ klei ruă êngoh bi ƀlĕ êrah, 5 čô djiê. Đăo knăl, klei ruă êngoh bi ƀlĕ êrah srăng bluh mâo lu hlăm knhal jih mlan 8 lehanăn mlan 9, klei anei huĭ srăng ngă lu đei mnuih nao đih mdrao ti sang êa drao. Hoàng Hải Phúc mtă, čiăng bi hrŏ ênoh mnuih ruă kjham nao đih mdrao, yuôm bhăn hĭn jing klei thâo săng mơ̆ng grăp čô mnuih ƀuôn sang hlăm bruă bi mdoh wăl hdĭp mda, gang mkhư̆ klei kêč kĕ. Tơdah êngoh brei nao mtam kơ anôk bruă mdrao mgŭn ksiêm mkă dlăng lehanăn dŏng mdrao: “Hŏng bruă klam jing Anôk bruă đru kčĕ kơ Knơ̆ng bruă mdrao mgŭn čiăng Anôk bruă ba mdah dŭm mta hră m’ar gĭt gai ƀiădah lu alŭ wăl, anôk bruă ăt ngă ngơi, amâo mđing, ka hluê ngă kjăp hdră gang mkhư̆ klei ruă êngoh bi ƀlĕ êrah hlăm wưng êgao. Hdră msir yuôm bhăn hĭn ară anei jing mtô mblang, mtrŭt mjhar mnuih ƀuôn sang thâo săng klei truh huĭ hyưt mơ̆ng klei ruă čiăng kơ mnuih ƀuôn sang mâo hdră răng mgang pô. Tal dua, jing klei hgŭm kngan mơ̆ng dŭm gưl, dhar bruă, êpul êya ti alŭ wăl čiăng mtô mblang kơ mnuih ƀuôn sang hluê ngă jăk hdră bi mdoh wăl hdĭp mda, mdjiê hluăt lŏk, kêč ƀloh ti grăp gŏ sang. Hdră anei brei dưi ngă nanao srăng đru mkhư̆ phŭn bi mtưp klei ruă”.