Thŭn 2023, hlăm lăn čar mâo 82 čô djiê kyua klei ruă anei, bi knŏng krĭng Lăn Dăp Kngư mâo 20 čô, hlăm anăn ti čar Gia Lai mâo 14 čô leh anăn Dak Lak mâo 4 čô. Hlăm 3 mlan akŏ thŭn anei, hlăm lăn čar mâo 27 čô djiê kyua klei ruă khŏ mơ̆ng asâo miêo kĕ, ti čar Dak Lak mâo 4 čô, Gia Lai mâo 2 čô. Êjai anăn, dua čar anei dôk mâo hnơ̆ng tlŏ mgang vaccine ƀiă hĭn ti alŭ wăl, Gia Lai knơ̆ng mâo mă êbeh 19% leh anăn Dak lak mâo mâo mă êbeh 37%.

Hlue si Viên Chinh Chiến, khua kiă kriê anôk bruă ksiêm dlăng kman krĭng Lăn Dăp Kngư, klei arưp aram klei ruă khŏ lŏ dơ̆ng mâo leh anăn tưp kơ mnuih jing lu sơnăk êjai krĭng Lăn Dăp Kngư dôk hlăm yan bhang. Kyuanăn dŭm alŭ wăl čiăng ktang phĭt hlăm bruă kriê dlăng asâo miêo, mtrŭt bi hmar bruă tlŏ mgang vaccine gang mkhư̆ klei ruă khŏ leh anăn mđĭ hĭn bruă hâo hưn čiăng kơ mnuih ƀuôn sang thâo klă klei hŭi hyưt mơ̆ng klei ruă anei.