Mđing truh bi hdơr 76 thŭn hruê kahan êka – djiê êngiă, knơ̆ng bruă duh mkra mnia mblei 715 (Binh đoàn 15) mkŏ mjing bruă mkă dlăng klei suaih pral grăp tuôr leh anăn mbha êa drao amâo mâo mă prăk kơ mnuih mă bruă ti anôk bruă leh anăn phung knŭk kna dlăng ba ti dŭm să knông lăn čar Gia Lai.

Mkŏ mjing mơ̆ng hruê 20 – 27/7, Sang êa drao lĭng kahan- knơ̆ng bruă duh mkra mnia mblei 715 ksiêm mkă hrŏng kơ 1200 čô mnuih mă bruă, khua bruă Đảng nah gŭ, khua mduôn, khua ƀuôn, phung mâo kơhưm, phung kahan êka, gŏ sang knŭk kna dlăng ba ti dŭm să Ia O, Ia Khai, Ia Čiă (kdriêk Ia Grai, čar Gia Lai) čiăng hmao ƀuh hnưm dŭm klei ruă hgăm amâodah dŭm klei ruă dleh hlao čiăng mdrao mgŭn tŭ dưn. Leh mkă dlăng leh anăn mblang kơ klei suaih pral, knơ̆ng bruă mbha êa drao amâo mâo mă prăk kơ dŭm gŏ sang. Bruă anei mâo knơ̆ng bruă 715 mkŏ mjing grăp thŭn hŏng mta kñăm dưi ksiêk mbha, bi klă klei suaih pral mnuih mă bruă hluê si klei čuăn. Mbĭt anăn hlăk mblang, đru kcĕ, mdrao mgŭn kơ phung khua mduôn, khua ƀuôn, phung mâo kơhưm, phung kahan êka, gŏ sang knŭk kna dlăng ba čiăng răng mgang klei suaih pral, mđĭ hnơ̆ng klei hdĭp.