Ti anăp boh sĭt klei ruă ală hrah tưp lar pral hlăm yang ƀuôn, boh nik ti lu sang hră mơar, hruê mbruê 12/9, Knơ̆ng bruă mdrao mgŭn čar Kon Tum mâo hră mtrŭn mơĭt kơ dŭm knơ̆ng, dhar bruă djŏ tuôm, bruă sang čư êa 10 kdriêk, ƀuôn prŏng hlăm čar, dŭm anôk bruă djŏ tuôm leh anăn sang êa drao ti alŭ wăl brei čŏng pô, mđĭ hĭn bruă gang mkhư̆ klei ruă ală hrah.

Hluê anăn, bi hŏng dŭm anôk bruă djŏ tuôm, knơ̆ng bruă mdrao mgŭn mñă brei ksiêm dlăng, hmao ƀuh hnưm phung mâo klei ruă, boh nik ti dŭm sang hră mơar, anôk bruă, anôk bruă mă, hluê ngă dŭm hdră êlan amâo mâo brei klei ruă bluh lar hluê si klei mtă mơ̆ng Anôk bruă mdrao mgŭm mkăp – Phŭn bruă mdrao mgŭn. Knơ̆ng bruă mdrao mgŭn čar Kon Tum ăt mñă kơ knơ̆ng bruă mtô mjuăt bi hriăm, bruă sang čư êa 10 kdriêk, ƀuôn prŏng hlăm čar tơdah ƀuh hđeh mâo dŭm klei bi knăl msĕ si êngoh, êmăn, ruă kŏng đŏk, mâo eh ală dleh mblang ală, blĕ ti anăn knga amâodah ti gŭ kang čiăng mtô lač ba hđeh nao mkă dlăng, mdrao mgŭn.