VOV4.Êđê- Ti čar Kon Tum mơ̆ng lu thŭn anei mâo leh klei phung aê mdrao ti dŭm anôk mdrao mgŭn knŭk kna akâo bi mlih anôk mă bruă leh anăn mdei bruă. Hŏng čar krĭng čư̆ čhiăng adôk lu klei dleh dlan msĕ si Kon Tum, bruă kƀah mnuih mă bruă, boh nik mnuih mă bruă mâo klei thâo, hriăm lu bruă mdrao mgŭn dôk jing klei rŭng răng hlăm bruă kriê dlăng klei suaih pral mnuih ƀuôn sang. Ti anăp klei anei, čar Kon Tum ăt mâo leh dŭm hdră kñăm krơ̆ng phung ngă bruă mdrao mgŭn.

Tĭng mơ̆ng thŭn 2018 truh kơ ară anei, mâo leh 59 čô nai aê mdrao mâo hnơ̆ng hriăm gưl prŏng ti dŭm anôk bruă mdrao mgŭn knŭk kna mơ̆ng čar Kon Tum akâo mdei bruă. Knŏng 6 mlan êgao ti čar anei mâo leh 3 čô aê mdrao lehanăn 1 čô dược sỹ mdei bruă. Aduôn Huỳnh Thị Hồng, bi ala Êpul gơ̆ng bruă ƀuôn sang čar Kon Tum bi êdah klei huĭ hyưt anăp klei kƀah mnuih mă bruă, phung hriăm lu akâo mdei bruă jih.

        “Sang êa drao prŏng čar Kon Tum mơ̆ng mrô 2 đĭ mrô 1 mâo 750 boh jhưng đih dôk čiăng kơ mnuuih mă bruă. Aê mdrao lehanăn knuă druh mdrao mgŭn akâo mdei bruă amâo dah nao mă bruă ti anôk mkăn jăk găl hĭn ngă kƀah leh mnuih mă bruă mâo hnơ̆ng thâo lu ti dŭm sang êa drao knŭk kna”.

Phung aê mdrao ti Sang êa drao prŏng čar Kon Tum ngă bruă mdrao mgŭn kơ mnuih ruă

        Hluê si Lê Ngọc Tuấn, Khua anôk bruă sang čư̆ êa čar Kon Tum, mta phŭn ngă grăp thŭn ti čar mâo êbeh 14 čô nai aê mdrao akâo mdei bruă, akâo nao mă bruă ti anôk mkăn jing klei kơ hnư hrui wĭt lehanăn klei găl mă bruă. Boh sĭt brei ƀuh, hnư hrui wĭt, klei găl mă bruă ti anôk bruă mdrao mgŭn knŭk kna mơ̆ng čar ƀiă hĭn mkă hŏng hnư hrui wĭt, klei găl mă bruă ti anôk bruă mdrao mgŭn ti dŭm ƀuôn prŏng mkăn. Kyua anăn, hluê si Lê Ngọc Tuấn čiăng krơ̆ng phung knuă druh mă bruă mdrao mgŭn brei mâo hdră ruh mtlaih klei anei kơ anôk bruă mdrao mgŭn knŭk kna:

        “Čiăng krơ̆ng êpul nai aê mdrao brei drei mkra mđĭ hnư hrui wĭt kơ êpul nai aê mdrao dôk mă bruă hlăm anôk bruă mdrao mgŭn knŭk kna. Duh bi liê kơ anôk bruă nah gŭ, kdrăp mnơ̆ng čiăng mjing wăl anôk mă bruă jăk hĭn. Mâo hdră mtrŭn jăk găl, hdră brei nao mjuăt hriăm, mđĭ hnư hrui wĭt kơ êpul aê mdrao dôk mă bruă”.

Phung ngă bruă mdrao mgŭn čar Kon Tum hlăm hdră mdrơ̆ng hŏng Covid-19

        Ăt hluê si Lê Ngọc Tuấn, Khua anôk bruă sang čư̆ êa čar Kon Tum, ti anăp klei phung aê mdrao ti anôk bruă mdrao mgŭn knŭk kna akâo mdei bruă amâo dah nao mă bruă ti anôk mkăn, thŭn 2020, Anôk kriê dlăng bruă Đảng čar Kon Tum mâo leh hră mtrŭn brei klei jăk găl kơ phung knuă druh mă bruă mdrao mgŭn nao hriăm adŭ mdrao thơ̆ng mdrao mgŭn gưl 1, gưl 2 dưi đru prăk hriăm mơ̆ng knơ̆ng prăk knŭk kna. Anôk bruă sang čư̆ êa čar Kon Tum ăt ba mdah Hdră mtrŭn mđĭ kyar mnuih mă bruă mơ̆ng čar truh ti thŭn 2030, tă hdră mă bruă truh thŭn 2050, hlăm anăn ba mdah hdră mđĭ klei thâo kơ mnuih mă bruă ti anôk bruă mdrao mgŭn. Khă snăn, boh sĭt brei ƀuh, dŭm hdră mtrŭn čiăng krơ̆ng phung knuă druh mă bruă mdrao mgŭn ti Kon Tum ăt ka dưi pŏk ngă tŭ dưn lehanăn kƀah klei mđrăm mbĭt ăt dôk mâo phung knuă druh, mnuih mă bruă akâo mdei bruă, akâo nao mă bruă ti anôk mkăn./.

                                                    Pô mblang: H’Nêč Êñuôl