Klei bi lông iêo jak êbeh 40 anôk bruă sang hră gưl hđeh ti 10 kdriêk, ƀuôn prŏng mơ̆ng čar Kon Tum hgŭm. Grăp êpul bi lông mâo 3 čô, bi lông ti 2 êpul bi lông klei thâo leh anăn hlue ngă. Klei bi lông kơ klei thâo, dŭm êpul mkŏ mjing mnơ̆ng ƀơ̆ng kơ hđeh điêt mâo wăl klei mblang kơ mnơ̆ng dhơ̆ng tŭk, hdră tŭk knă. Klei lông ngă, phung nai leh anăn phung ngă bruă tŭ knă mơ̆ng grăp êpul tŭk knă 10 hnư mnơ̆ng huă yang hruê leh anăn tlam kơ hđeh hŏng ênoh 20 êbâo prăk/ hnư/hruê.  Dŭm mta mnơ̆ng ƀơ̆ng rơ̆ng 4 êpul mnơ̆ng ƀơ̆ng.

Klei bi lông jing gưl kơ phung knuă kriê dlăng, nao mtô, phung mă bruă ti dŭm anôk mtô bi hriăm phung hđeh bi tuôm, mbŏ klei thâo, mđĭ lar klei dưi mkra mjing hlăm klei tŭk knă kơ hđeh, msĕ si bruă mkŏ mjing klei huă ƀơ̆ng, mnơ̆ng ƀơ̆ng grăp hruê, hlue hruê kăm, hlue yan, mơ̆ng anăn, đru ruah lu mta mnơ̆ng ƀơ̆ng jăk, čiăng kơ mnơ̆ng ƀơ̆ng hđeh mâo thiăm lu mta leh anăn rơ̆ng mnơ̆ng tŭ jăk.