Êbeh 170.000 čô hđeh dŭm gưl ti čar Kon Tum nao sang hră. Ti anăp klei arưp aram huĭ srăng bluh đĭ klei ruă tưp, boh nik klei ruă êngoh bi ƀlĕ êrah, mƀlĕ sruê, klei ruă čuh kô̆ kŏng đŏk, anôk bruă mdrao mgŭn Kon Tum dôk mtrŭt mđĭ hdră gang mkhư̆ čiăng kơ phung hđeh dưi nao sang hră hŏng klei êđăp ênang.  Hluê anăn, anôk bruă mdrao mgŭn čar Kon Tum mkŏ mjing leh êpul nao ksiêm dlăng hdră gang mkhư̆ klei ruă tưp, boh nik dŭm krĭng dôk mâo mnuih ruă, huĭ srăng bluh đĭ lehanăn dŭm alŭ wăl ka kriê dlăng kjăp hdră tlŏ mgang amâo dah ênoh tlŏ mgang ƀiă.

Aê mdrao thơ̆ng kơ adŭ mdrao II Đỗ Ngọc Hoà, Kơiăng khua Knơ̆ng bruă mdrao mgŭn čar Kon Tum brei thâo, hŏng klei ruă bŏk čuh kô̆ kŏng đŏk lehanăn dŭm klei ruă mkăn, Kon Tum mâo leh Phŭn bruă mdrao mgŭn mkăp djăp vaccine lehanăn ară anei dôk mtrŭt phung amĭ ama atăt ba hđeh nao tlŏ mgang kñăm răng mgang klei suaih pral hlăm yan nao sang hră./.