VOV4.Êđê- Čŏng mâo hdră êlan gang mkhư̆ klei ruă kơ phung hđeh hlăm wưng bi mlih yan, knơ̆ng bruă mdrao mgŭn čar Kontum kiă kriê leh dŭm anôk bruă mdrao mgŭn, lehanăn dŭm boh sang êa drao mđĭ hĭn klei hâo hưn kơ dŭm klei amâo mâo jăk mơ̆ng dŭm mta klei ruă kreh tuôm hŏng phung hđeh. Mbĭt hŏng anăn mâo lu hdră, msĕ si bi lar hŏng loa bi kčăi, êdeh hiu por hŏng loa, hiu mbha hră hliê, afič, bi lar hlăm hla pŏk yang ƀuôn...

Ktrâo atăt kơ phung ƀuôn sang hdră gang mkhư̆ djăp mta klei ruă kơ hđeh. Truh kơ ară anei čar Kontum ênoh phung hđeh mâo klei ruă hrŏ mkă hŏng wưng anei thŭn dih, msĕ si klei ruă jơ̆ng kngan ƀăng êgei hrŏ truh 37 čô, čut hrŏ 53 čô... Siămdah tui si gưl 3 thŭn sa blư̆, thŭn 2022 dưi đăo knăl jing thŭn bluh đĭ klei ruă êngoh bi ƀlĕ êrah ti čar Kontum./.

         Pô mblang: Y-Khem Niê