Hlăm adŭ bruă krŭ wĭt ai ktang mơ̆ng Sang êa drao hđeh čar Gia Lai, amai Trần Khánh Huyền (ti wăl krah Ayun Pa, čar Gia Lai) dôk guôn anak lŏ hdơr leh klei mbriah kblač kŏng đŏk. Hlăm ală mta amai mâo klei hmăng hmưi leh dŭm hruê dleh dlan mbĭt hŏng anak. Amai Huyền brei thâo, mơ̆ng hruê k’kiêng, ĕ tuôm hŏng lu klei dleh dlan kyua klei anei, kreh kdlăk êa ksâo, bŏk kđuč hlăm ƀăng knga, ngă kơ ĕ awăt leh anăn ktiêl. Myun dưi thâo hdră mbraih duah klei tlao, amai blŭ hrăm leh anăn mâo klei đru. Mơ̆ng ênoh êrô êbat, mkă dlăng truh kơ mbriah, jih jang amâo mâo liê prăk kăk leh anăn jăk êdi:

“Bruă nao mkă dlăng, êpul ngă bruă jăk êdi. Diñu mtô jih jang, đru brei prăk êa săng. Ară anei mbriah, jing sa čô amĭ pô mâo klei hơĭt hĭn čiăng kơ anak pô msĕ hŏng phung hđeh mkăn, ruă bŏk hlăm ƀăng knga ăt srăng hrŏ mơh mkă hŏng ka mbriah”.

Ti anôk dôk guôn, ama anak ayŏng Phùng Theo Sáng, mnuih djuê ana Mông, ti alŭ Quảng Hòa, kdriêk Dak Glŏng, čar Dak Nông, ăt dôk čang guôn anak dôk mbriah kyua kblač kƀuê mơ̆ng tian amĭ. Ayŏng Sáng brei thâo, anak čô 16 thŭn leh anăn dăl hlăm 16 thŭn êgao, ñu hmăng hmưi anak dưi mbriah, ƀiădah amâo mâo dưi kyua klei hdĭp gŏ sang dleh dlan. Ñu hmăng hmưi leh klei mbriah anei, anak ñu thâo blŭ, huă ƀơ̆ng čiăng mâo klei jhŏng hĭn hlăm klei blŭ tlao.

“Hdră anei jing jăk êdi kyua mâo klei đăo knang kơ êpul aê mdrao ngă klei mbriah. Hmei hriê tinei mbriah kơ anak čiăng anak dưi huă ƀơ̆ng, blŭ tlao, êdei anăp dưi dôk mô̆ anak.”

Anei jing gưl tal dua hdră mbriah duah klei tlao, sa mta bruă jăk mơ̆ng êpul Operation Smile Việt Nam bi mguôp hŏng sang êa drao hđeh Gia Lai mkŏ mjing ti čar Gia Lai. Hdră thŭn anei ngă klei mkă dlăng hrŏng kơ hlăm brô 200 čo hđeh leh anăn mbriah kơ 100 čô hđeh kblač kƀuê, amâo mâo jăk kƀuê, kblač kŏng đŏk, êbeh kđiêng, bi lir kđiêng jơ̆ng kngan ti čar Gia Lai leh anăn đa đa čar riêng gah. Phung ruă dưi ksiêm mkă hrŏng, mdrao mgŭn leh anăn mbraih amâo mâo mă prăk, mbĭt anăn đru kơ ênoh prăk êrô êbat, huă ƀơ̆ng. Thạc sĩ, aê mdrao Bạch Minh Tiến, khua anôk mbriah lŏ bi msiam, sang êa drao Bi hgŭm Việt Nam – Cuba, khua êpul brei thâo:

“Phung hmei mâo phung mbriah, phung êa mdrao leh anăn phung ngă bruă hriê mơ̆ng Hà Nội, ƀuôn prŏng Hồ Chí Minh, Nghệ An leh anăn Huế, grăp čô mă bruă hur har, leh anăn hmei mprăp leh êa drao gŭn, kdrăp yua, mnơ̆ng yua rơ̆ng kơ phung hđeh dưi mâo djăp ênŭm leh anăn hmăng hmưi ba wĭt klei tlao kơ phung hđeh”.

Bi sang êa drao hđeh Gia Lai, aduôn Từ Thị Mai Linh, k’iăng khua kiă kriê sang êa drao brei thâo, sang êa drao mkŏ mjing klei găl hĭn kơ mnuih ruă, phung hlăm gŏ sang čiăng kơ gưl mbriah tla anei dưi tŭ jing kluôm dhuôm:

“ Ênoh hđeh hriê ti sang êa drao jing lu sơnăk, êpul ăt mâo hdră êlan mă bruă, mă mmăt leh anăn mđĭ hĭn klei bi mguôp plah wah sang êa drao hđeh mbĭt hŏng êpul čiăng mă bruă jăk hĭn leh anăn kluôm dhuôm hĭn”.

Bruă ngă hdră anei ba wĭt boh tŭ dưn yuôm bhăn, bi êdah klei uêñ mĭn mơ̆ng êpul êya ala ƀuôn hŏng phung hđeh, phung hđeh amâo mâo jăk asei mlei mâo klei hdĭp dleh dlan dưi mdrao mgŭn hŏng hnơ̆ng tŭ jăk hĭn. Hdră dưi ba wĭt klei blŭ tlao, klei jhŏng kơ phung hđeh amâo mâo jăk asei mlei, čiăng kơ digơ̆ dưi msĕ hŏng phung hđeh mkăn, mâo klei găl hriăm hră, hlăp lêñ leh anăn đĭ kyar msĕ, đru kơ phung hđeh mâo klei hdĭp êdei anăp jăk siam hĭn. Hdră mbriah duah klei tlao amâo djŏ  knŏng đru kơ phung hđeh dưi blŭ tlao huă ƀơ̆ng, ƀiădah lŏ đru kơ phung nai mdrao ti alŭ wăl mđĭ hĭn klei thâo mă bruă, mâo mă klei hriăm mơ̆ng phung thơ̆ng kơ bruă.