VOV4.Êđê- Hruê mmông êgao, dŭm čar alŭ wăl krĭng Lăn Dăp Kngư mtrŭt bi hmar bruă tlŏ mgang vaccine Covid-19, hlăm anăn, mđing tal êlâo kơ hđeh mơ̆ng 5 truh ti gŭ 12 thŭn, êjai diñu nao mŭt hlăm thŭn hriăm mrâo.

Dak Lak jing čar mâo hnơ̆ng tlŏ vaccin Covid-19 kơ hđeh mơ̆ng 5 truh ti gŭ 17 thŭn ti Dak Lak ăt adôk ƀiă. Hlue si Hoàng Hải Phúc, K’iăng Khua Anôk bruă ktuê dlăng klei ruă čar Dak Lak, mta phŭn ngă kơ hnơ̆ng tlŏ vaccin Covid-19 ti êpul anei ƀiă jing kyua ka mâo klei bi tŭ ư mơ̆ng phung amĭ ama. Lu phung lač vaccin mâo lu mta amâo jăk kơ klei suaih pral leh anăn hnơ̆ng hđeh hriăm hră… Êngao anăn, kyua klei ruă Covid-19 hrŏ leh anăn lu phung amĭ ama mâo klei mĭn ngă ngơi mang. Čiăng mđĭ hnơ̆ng tlŏ vaccin kơ hđeh mơ̆ng 5 truh ti gŭ 17 thŭn, bruă mdrao mgŭn srăng mđĭ ktang klei bi hgŭm hŏng Knơ̆ng bruă sang hră mtô bi hriăm čar čiăng hâo hưnm mtrŭt phung amĭ ama ba anak tlŏ vaccin, kñăm rơ̆ng luôm hlăm êpul êla, ñĕ kơ klei ruă tưp bluh mâo hlăm sang hră hlăm thŭn hriăm mrâo.

        “Hŏng phung hđeh mơ̆ng 5 truh 12 thŭn snăn brei bi hgŭm hŏng bruă sang hră čiăng si bĕ ngă phung nai mtô, sang hră iêô jak mtrŭt mjhar hâo hưn mtô mblang kơ hđeh sang hră, amĭ ama thâo săng anei jing klei dưi, bruă klam kơ grăp čô hđeh, grăp čô amĭ ama čiăng si bĕ ngă dưi gang mkhư̆ klei ruă tưp hlăm êpul êya. Tơdah amâo mâo klei dưi gang mkhư̆ hlăm êpul êya anăn ti anăp mta mrâo B.A.4, B.A.5 dưi mŭt hlăm Dak Lak amâo thâo êlâo ôh. Tơdah amâo mâo dưi gang mkhư̆ hlăm êpul êya anăn Covdi-19 dưi lŏ wĭt mâo jing klei ênưih snăk.”

Dak Lak mđĭ pral hnơ̆ng tlŏ vaccin Covid-19

Čiăng ƀư̆ mkra boh klei ngă ngơi mang hlăm hdră gang mkhư̆ klei ruă tưp Covid-19, hlăm wưng êgao, čar Lâm Đồng gĭr pŏk ngă lu hdră msir, boh nik mđĭ ktang bruă tlŏ mgang kơ phung hđeh hlăm thŭn hriăm mrâo. Čiăng kơ hdră gang mkhư̆ kleu ruă Covid-19 dưi mâo klei tŭ dưn jăk, mđĭ ênoh mnuih nao tlŏ mgang, čar Lâm Đồng dôk pŏk ngă hdră tlŏ mgang vaccin Covid-19 hlăm kluôm čar, hlăm anăn kƀĭn mđing bi leh aruăt tal 3 kơ phung hđeh mơ̆ng 12 truh ti gŭ 18 thŭn êlâo kơ mŭt hlăm thŭn hriăm mrâo 2022­-2023.  Mơ̆ng leh hdră tlŏ mgang dưi pŏk ngă mâo lu phung hđeh nao ti dŭm anôk tlŏ mgang hlue si klei hưn mthâo mơ̆ng bruă mdrao mgŭn. Adei Trần Thanh Vy, hđeh sang hră gưl 2 Lộc Sơn, ƀuôn prŏng Bảo Lộc, brei thâo:

        “Kâo dăp leh mmông leh anăn nao ti anôk tlŏ mgang djŏ mmông, djŏ hruê. Êngao anăn, kâo lŏ iêô ƀĭng găp nao tlŏ mgang, hrăm mbĭt ngă ya klei Knŭk kna mtă čiăng gang mkhư̆ klei ruă Covid-19”.

Kñăm mđĭ ktang pral hnơ̆ng tlŏ vaccin, mrâo anei, Knơ̆ng bruă sang čư̆ êa čar Dak Nông mkŏ mjing knăm “Pŏk ngă tlŏ mgang vaccin Covid-19” thŭn 2022. Wăt tơdah mâo leh êbeh 87% ênoh mnuih ƀuôn sang êbeh 18 thŭn ti Dak Nông dưi tlŏ aruăt vaccin Covid-19, dôk tal 6 hlăm kluôm ala, ƀiădah hnơ̆ng tlŏ vaccin Covid-19 ti lu anôk ti Dak Nông hlăk mâo klei bi knăl êmưt, boh nik aruăt tal 2 kơ phung hđeh mơ̆ng 5 truh 12 thŭn, aruăt tal 3 kơ phung hđeh mơ̆ng 12 truh ti gŭ 18 thŭn. Ti anăp boh klei anăn, Knơ̆ng bruă sang čư̆ êa čar Dak Nông mtă kơ dŭm anôk bruă alŭ wăl hlăm kluôm čar mđĭ ai tiê đua klam, kƀĭn klei găl mđĭ pral hnơ̆ng tlŏ ênŭm aruăt klă klơ̆ng kơ phung hđeh mơ̆ng 5 truh ti gŭ 12 thŭn; gĭr bi leh hnưm hĭn bruă tlŏ aruăt tal 4 kơ mnuih ƀuôn sang mơ̆ng 18 thŭn kơ dlông leh anăn mđĭ pral tlŏ aruăt ta; 2 kơ phung mơ̆ng 12 truh ti gŭ 18 thŭn hlue si Phŭn bruă mdrao mgŭn mtă. Nguyễn Văn Toàn -  Khua Knơ̆ng bruă sang hră mtô bi hriăm Dak Nông brei thâo, bruă mkŏ mjing Knăm “Pŏk ngă tlŏ mgang vaccin Covid-19” hlăm wưng thŭn hriăm mrâo mphŭn kčưm jing yuôm bhăn snăk, leh anăn hđeh sang hră dŭm gưl jing phung dưi mđing dlăng êdi.

“Čiăng mprăp kơ thŭn hriăm mrâo kơ anăp snăn Knơ̆ng bruă mdrao mgŭn bi hgŭm hŏng Knơ̆ng bruă sang hră mâo hdră kčah, mơ̆ng ară anei truh kơ mphŭn pŏk thŭn hriăm jing mđĭ ktang tlŏ vaccin kơ phung hđeh hlăm gưl thŭn. Hlăm anăn snăn bi hgŭm čiăng hlue ngă dŭm hdră msir čiăng gang mkhư̆ lu mta klei ruă tưp, boh nik klei ruă êngoh bi ƀlĕ êrah. Boh phŭn anei ară anei dưi gĭt gai mơ̆ng Knơ̆ng bruă tru kơ 2 knơ̆ng bruă leh anăn dŭm anôk bruă djŏ tuôm, boh nik Knơ̆ng bruă sang čư̆ êa kdriêk, ƀuôn prŏng čiăng hlue ngă klei anei, leh anăn ksiêm yap dŭm hnơ̆ng kčah. Dŭm ƀuôn hgŭm, să, wăl krah ƀiădah mâo ênoh vaccin tlŏ ƀiă snăn boh nik mđing čiăng dưi mâo hdră kčah Knŭk kna jao”.

Dak Nông mkŏ mjing knăm “Pŏk ngă tlŏ mgang vaccin Covid-19”

 Msĕ snăn mơh, anôk brưa djŏ tuôm čar Gia Lai ăt dôk pŏk ngă lu hdră msỉ čiăng lŏ dŏng mđĭ ênoh tlŏ vaccin Covid-19 kơ hđeh mŏng 5 truh 12 thŭn. Đinh Hà Nam-  K’iăng Khua Knŏng brưa mdrao mgŭn Gia Lai brei thâo, čiăng lŏ dơ̆ng mđĭ ênoh tlŏ vaccin Covid-19 kơ êpul anei, čar Gia Lai ngă leh leh anăn dôk gĭr ktưn pŏk ngă lu hdră msir msĕ si: Bi hgŭm tliêr kjăp hŏng bruă hâo hưn mtô mblang, bruă sang hră hlăm klei hâo hưn, mtrŭt mjhar hđeh sang hră; mđĭ ksiêm dlăng, ktuê dlăng, ksŭl mbŭ, pŏk ngă tlŏ mgang mơ̆ng gưl nah gŭ. Nam brei thâo, ară anei, grăp hruê čar Gia Lai ăt čih yap dŭm pluh čô djŏ Covid-19. Kyua anăn, bruă mdrao mgŭn mtă kơ phung amĭ ama, brei tlŏ mgang djăp ênŭm čiăng rơ̆ng dưi gang mkhư̆ klei ruă tưp kơ phung hđeh, boh nik êlâo kơ thŭn hriăm mrâo giăm truh:

“Nao truh ti gŏ sang iêô đing blŭ kơ phung amĭ ama mdiăng phung anak nao ti anôk tlŏ mgang. Hlăm wưng kơ anăp, hdră hâo hưn mtô mblang ăt jing mrô sa. Klei yuôm bhăn hĭn jing brei klei gĭt gai kơ alŭ wăl, gưl să, ƀuôn hgŭm, wăl krah hŏng dŭm sang hră iêô mthưr gưl thŭn anei nao tlŏ mgang. Bruă mdrao mgŭn hmei grăp mmông pŏk anôk tlŏ ti dŭm anôk mdrao mgŭn, srăng pŏk anôk tlŏ êrô hiu truh ti alŭ, ƀuôn. Čang hmăng prŏng hĭn jing phung amĭ ama brei anak čô pô nao tlŏ mgang čiăng rơ̆ng dưi gang mkhư̆ klei ruă tưp kơ hđeh pô leh anăn êpul êya”

Hŏng lu hdră msir mdê mdê, bruă sang čư̆ êa leh anăn bruă djŏ tuôm ti dŭm čar hlăm krĭng wăl Lăn Dap Kngư ngă leh, leh anăn dôk mđĭ pral hnơ̆ng tlŏ vaccin Covid-19 kơ dŭm gưl thŭn mdê mdê, hlăm anăn mđing dlăng kơ hđeh, hlăk thŭn hriăm mrâo mphŭn kčưm./.

Pô mblang: H’Zawut Ƀuôn Yă