Čar Dak Lak dôk pŏk ngă kjăp dŭm hdră msir kñăm ksiêm dlăng lehanăn gang mkhư̆ klei ruă êngoh bi ƀlĕ êrah, hlăk ênoh mnuih ruă đĭ lu lehanăn mâo leh mnuih djiê. Truh ară anei, kluôm čar Dak Lak mâo êbeh 2.660 čô ruă êngoh bi ƀlĕ êrah, kah knar grăp hruê mâo 30 – 100 čô ruă mrâo. Păt čiăng jih ƀuôn hgŭm mâo mnuih ruă, hlăm anăn mâo lu ti ƀuôn hgŭm Ƀuôn Ama Thuôt, dŭm krĭng msĕ si Krông Pač, Čư̆ Mgar,  Sơn Hòa, Tây Hòa lehanăn Sông Hinh.

Mâo leh sa čô ruă djiê. Anôk bruă sang čư̆ êa čar Dak Lak ba mdah leh hră mtrŭn mjêč, gĭt gai dŭm alŭ wăl mkŏ mjing hdră mdjiê hluăt lŏk, bi mdoh wăl hdĭp mda grăp gưl, mđĭ hdră mtô mblang, mđĭ klei thâo săng. Anôk bruă mdrao mgŭn ăt pŏk hdră mtô  mblang, mtă kơ mnuih ƀuôn sang bi mdoh pưk sang, mdjiê kêč ƀloh, gang mkhư̆ klei kêčkĕ. Pŏk hdră ksiêm dlăng kluôm, msir mghaih jih anôk mâo klei ruă./.