Thŭn hriăm mrâo 2024 – 2025 kdriêk Kon Plông, čar Kon Tum mâo êbeh 7.000 čô hđeh sang hră hŏng 29 bĭt sang hră. Êjai phung hđeh adŭ 1 kčưm nao sang hră, digơ̆ mâo phung nao mtô kơ klei bi mdrơ̆ng tơdah mâo klei mgei lăn. Nao Cao Thị Nguyệt, khua kiă kriê sang hră gưl 1 Mang Đen brei thâo:

“Phung hđeh thâo leh kơ hdră mkhư̆ mgang tơdah mâo klei mgei lăn, boh nik jing diñu thâo leh anăn mâo bruă ngă hmar. Êjai mâo djăp mta klei amâo mâo jăk diñu srăng nao đuê̆ dăp ti anôk êđăp ênang hĭn”.

Nai Võ Quang Vinh, k’iăng khua adŭ bruă sang hră mơar kdriêk Kon Plông mñă klă čŏng pô bi mdrơ̆ng hŏng klei mgei lăn, dŭm thŭn hŏng anei bruă mđĭ hĭn klei thâo kơ phung hđeh sang hră leh anăn phung nai čiăng bi hrŏ klei hmăi tơdah mâo klei mgei lăn ti alŭ wăl jing bruă jêñ jêñ mơ̆ng bruă mtô mjuăt bi hriăm kdriêk:

“Adŭ bruă sang hră mơar bi mguôp hŏng dŭm anôk bruă ngă klei hriăm tơdah tam mâo klei mgei lăn. Hŏng phung hđeh sang hră, phung nai ti dŭm sang hră êjai mâo klei hưn mgei lăn, jih jang phung hđeh sang hră srăng kbiă kơ tač, mŭt ti gŭ jhưng mdhô̆. Klei bi mdrơ̆ng mơ̆ng phung nai leh anăn hđeh sang hră jing jăk êdi”.

Klă sĭt brei ƀuh mơ̆ng mlan 4 thŭn 2024, êjai klei mgei lăn mâo jêñ hĭn ti kdriêk Kon Plông, čar Kon Tum, Anôk bruă ksiêm dlăng kơ boh lăn bi mguôp hong bruă sang čư êa alŭ wăl hmar ngă bruă, hâo hưn čiăng kơ mnuih ƀuôn sang mđĭ ai dưi bi mdrơ̆ng, bi hrŏ klei hmăi. Phạm Thanh Bình, K’iăng khua Êpul gĭt gai bi mdrơ̆ng hŏng klei truh yan adiê, tui duah đru dŏng leh anăn răng mgang mnuih ƀuôn sang, Khua adŭ bruă lŏ hma leh anăn mđĭ kyar krĭng ƀuôn sang kdriêk Kon Plông mñă klă:

“Kdriêk mkŏ mjing leh dŭm hdră êlan čiăng bi mdrơ̆ng, boh nik jing hâo hưn, mtô kơ hdră bi mdrơ̆ng. Truh kơ ară anei, hnơ̆ng mnuih ƀuôn sang dưi mâo klei mtô mâo hlăm brô êbeh 90%. Ti anăp mnuih ƀuôn sang mâo klei rŭng răng hŭi hyưt, leh mâo klei hâo hưn dưi thâo săng leh anăn amâo mâo lŏ rŭng răng lu ôh”.

Mrâo anei, êjai mâo gưl mgei lăn ktang truh kơ 5 độ richter, bi mgei kluôm krĭng Lăn Dap Kngư, anôk bruă ksiêm dlăng kơ boh lăn leh anăn bruă sang čư êa kdriêk Kon Plông lŏ dơ̆ng ngă klei hâo hưn, mtô kơ giăm 1000 čô mnuih ƀuôn sang kơ hdră mkhư̆ mgang, bi mdrơ̆ng hŏng klei mgei lăn. Mbĭt anăn mbha êbeh 26.700 pŏk hră, hră mtô bi mdrơ̆ng hŏng klei mgei lăn. Nai Prĭn Bùi Thị Nhung, Pô thơ̆ng ksiêm duah kơ klei mgei lăn, anôk bruă ksiêm dlăng kơ boh lăn Việt Nam brei thâo, mơ̆ng klei ksiêm dlăng klei hmăi mơ̆ng klei mgei lăn hŏng mnuih ƀuôn sang ti krĭng msăt mgei lăn kdriêk Kon Plông, čar Kon Tum, anôk bruă lŏ dơ̆ng čih mkra dŭm hră mơar klă hŏng boh sĭt čiăng mđĭ ai dưi bi mdrơ̆ng kơ boh klei mnuih ƀuôn sang năng ai srăng hdĭp mbĭt hŏng klei mgei lăn.

“Hmei thâo leh klei čiăng, klei hmăng hmưi mnuih ƀuôn sang, ăt msĕ mơh dŭm klei mnuih ƀuôn sang tuôm hlăm klei mgei lăn. Mơ̆ng anăn hmei čih mkra dŭm hră mơar mtô kơ mnuih ƀuôn sang čiăng găl guôp hŏng boh sĭt ti alŭ wăl”.

Hrăm mbĭt, đru kơ mnuih ƀuôn sang leh anăn bruă sang čư êa krĭng msăt mgei lăn kdriêk Kon Plông, čar Kon Tum, truh kơ ară anei anôk bruă ksiêm dlăng kơ boh lăn mdưm leh ti kdriêk 12 anôk ksiêm dlăng čiăng hmao ktuê dlăng boh sĭt, măt msĕ mơh đru kơ bruă ksiêm duah. Hluê ngă klei gĭt gai mơ̆ng Khua knŭk kna, anôk bruă dôk mkŏ mjing klei ksiêm duah êlam, bi klă phŭn agha ngă truh klei mgei lăn đĭ lu ti alŭ wăl. Čiăng đru kơ mnuih ƀuôn sang kdriêk Kon Plông mđĭ ai dưi bi mdrơ̆ng, hdĭp mbĭt hŏng klei mgei lăn, kahan alŭ wăl 5 ngă leh bruă mprăp bi mdrơ̆ng hŏng klei mgei lăn ti alŭ wăl. Bi kơ wưng sui, čar Kon Tum ăt tĭng leh kơ bruă mkra mlih hdră êlan mđĭ kyar čiăng bi djŏ guôp, mbĭt anăn bi hrŏ klei hmăi tơdah mâo klei mgei lăn.