Knŏng hlăm dua mlan akŏ thŭn 2024, kdriêk Krông Pač mâo leh 3 čô mnuih djiê kyua asâo miêo khŏ hĕ, jing kdriêk mâo ênoh mnuih ruă khŏ mơ̆ng asâo miêo kĕ lu hĭn hlăm čar Daklak. Y-Doãn Niê, K’iăng khua knơ̆ng bruă sang čư̆ êa kdriêk Krông Pač lač, bruă mdrơ̆ng hŏng klei ruă asâo miêo khŏ ti alŭ wăl dôk tuôm hŏng lu klei dleh dlan, kyua lu gŏ sang rông asâo miêo amâo mâo klei bi hgŭm ôh hŏng dŭm anôk bruă djŏ tuôm hlăm bruă anei:

 “Mnuih ƀuôn sang rông asâo miêo hlăm kdriêk lu jing phưi tha dôk hlăm pư̆k hlăm hma, lu blư̆ knuă druh bruă mdrao mgŭn mnơ̆ng rông truh čiăng tlŏ mgang, ƀiădah amâo mâo thâo mâo mă ôh asâo miêo, lehanăn ngă msĕ snăn amâo mâo čiăng tlŏ vaccine gang mkhư̆ klei ruă ôh”.  

Ti ƀuôn prŏng Ƀuôn Ama Thuôt amâodah ti ya anôk hlăm čar Daklak, mơ̆ng krĭng ƀuôn sang hlŏng truh kơ wăl krah, ƀuh sơăi asâo êran hiu hlăm êlan klông. Klei anei jing huĭ hyưt êdi hŏng mnuih êbat hiu hlăm êlan klông. Amai Trịnh Thị Hồng Hạnh, ti ƀuôn hgŭm Tân Lợi, Ƀuôn prŏng Ƀuôn Ama Thuôt dôk mâo nanao klei bi huĭ kyua tuôm mâo leh klei asâo kĕ:

 “Mâo hŏng anei sa hrue kăm êjai nao kơ sang mnia, snăn bhiâo riâo rit ƀuh asâo kbiă êran hriê, ngă kơ kâo kdjăt mmăng ai. Mmông anăn kyua ai tiê kƀla snăn kâo čiăng êran đuĕ, knư̆ hĭn mơh asâo tiŏ. Ƀuh asâo phưi tha, kâo huĭ hyưt êdi”.

Kah knar hlăm grăp thŭn, Daklak mâo hlăm brô 6.000 čô mnuih asâo kĕ bi ba mdrao tlŏ mgang. Hjăn mơ̆ng akŏ thŭn truh kơ ară anei, hlăm čar mâo leh 4 čô mnuih djiê kyua klei ruă mơ̆ng asâo miêo khŏ kĕ.

Đỗ Xuân Dũng, K’iăng khua knơ̆ng bruă lŏ hma čar Daklak brei thâo, mta phŭn ngă truh klei ruă khŏ mơ̆ng asâo miêo đĭ lu jing kyua lu drei asâo miêo ka mâo klei kiă kriê kjăp ôh, ênoh mâo tlŏ mgang knŏng ƀiă dhiă, mil 37%. Mta mkăn lĕ klei djă yua dŭm klei bhiăn, đŭ bi kmhal klei ngă soh kơ bruă kiă kriê rông ba asâo miêo jing ka kjăp mơh.

 “Dơ̆ng mơ̆ng êlâo dih truh kơ ară anei, ka mâo ôh klei bi kmhal kyua phưi tha asâo miêo truh kơ klei duah kĕ mnuih. Klei bhiăn snăn mâo leh, ƀiădah drei ka djă yua ôh. Mbĭt hŏng anăn klei hâo hưn mtă mtăn kơ bruă mdrơ̆ng hŏng klei ruă khŏ hlăm asâo miêo ka mâo klei kjăp mơh. Hŏng dŭm klei rông asâo miêo, ƀiădah amâo mâo hlue ngă djŏ hŏng klei bhiăn knŭk kna mtă mtăn, lehanăn ba truh klei jŭ jhat kyua asâo miêo kĕ mnuih, snăn dhar bruă mâo klei dưi mplĕ klei soh hŏng pô asâo miêo anăn”.

 Nguyễn Thiên Văn, K’iăng khua knơ̆ng bruă sang čư̆ êa čar Daklak, čiăng bi hrŏ klei bluh đĭ mơ̆ng klei ruă khŏ kơ asâo miêo, lehanăn bi hrŏ mơh ênoh mnuih djiê kyua asâo khŏ kĕ, snăn dŭm anôk bruă djŏ tuôm bi mđing ngă hĕ bi kjăp hdră tlŏ mgang kơ asâo miêo, tui si čar mtrŭn leh. Hlăm anăn, hyuă kjăp hĭn bruă răng kriê asâo, mđing kơ bruă tlŏ vaccine gang mkhư̆ klei ruă khŏ kơ asâo miêo, lehanăn mtă mtăn kơ mnuih ƀuôn sang thâo săng hĭn kơ klei jŭ jhat mơ̆ng klei ruă khŏ kyua asâo miêo kĕ. Nguyễn Thiên Văn brei thâo, klei jih jang mnuih ƀuôn sang thâo săng yơh jing klei tŭ kơ bruă gang mkhư̆ klei ruă khŏ kơ asâo miêo.

Băng: “Dŭm alŭ wăl brei mâo klei thâo mđing hâo hưn mtă mtăn kơ jih jang mnuih, kñăm čiăng kơ mnuih ƀuôn sang mâo klei thâo săng hĭn kơ klei jhat mơ̆ng klei asâo miêo kĕ. Mnuih rông asâo miêo bi hlue ngă kjăp bruă tlŏ mgang. Tơdah tăm tuôm hŏng klei asâo miêo kĕ, snăn bi nao tlŏ mgang mtam, mdrao mgŭn hĕ bi pral”.

Dak Lak hlăk dôk hlăm krah yan bhang không prŏng, adiê mdiă hlơr jing klei găl kơ klei ruă khŏ hŏng asâo miêo, snăn jing huĭ hyưt snăk hŏng anak mnuih. Kyuanăn, ƀaih hĭn mơh brei mâo klei thâo bi mguôp dŭm anôk bruă djŏ tuôm, jih jang mnuih ƀuôn sang brei mâo klei thâo săng hlăm bruă gang mkhư̆ klei ruă khŏ kơ asâo miêo, kñăm bi hrŏ klei jŭ jhat truh hŏng drei./.