Leh giăm 1 mlan kriê dlăng mô̆ kkiêng anak ti Sang êa drao Sang hră gưl prŏng Y Dược Ƀuôn Ama Thuôt, ayŏng Lang Văn Đại ti să Ea Kiêt, kdriêk Čư̆ M’Gar ngă hră mơar wĭt mơ̆ng Sang êa drao hŏng klei mơak jih ai tiê. Amai Lương Thị Nga, mô̆ ayŏng  Đại, truh tian kkiêng anak hlăk mrâo truh 30 hruê kăm ba tian. Ĕ điêt mâo klei ruă hlăm êlan bi êwa, mâo klei ruă lu mta leh anăn êrah amâo thâo êkŏ, ngă kơ gŏ sang rŭng răng snăk. Kyua mâo phung aê mdrao hmao mdrao, ĕ điêt tlaih leh mơ̆ng klei huĭ hyưt leh anăn mâo klei suaih pral.

 “Hlăk anăn năng ai mrâo mâo 7 mlan đuč, tal sa jing kkiêng anak amâo đei suaih msĕ si hđeh mkăn ôh, leh anăn amâo djăp mlan ôh, ƀiădah ară anei ĕ suaih leh snei gŏ sang hmei mơak snăk. Kâo ară anei ăt mơak mơh kyua anak ăt suaih asei mlei, mni lač jăk kơ aê mdrao đru leh lu snăk, kâo mơak snăk.”

Hlue si aê mdrao Võ Minh Thành, Khua sang êa drao Sang hră gưl prŏng Y Dược Ƀuôn Ma Thuôt, wăt tơdah mâo bruă ngă mơ̆ng mlan 2/2022, sang êa drao drông leh 4.035 hđeh kkiêng tinei, hlăm anăn mâo 318 čô hđeh mơ̆ng hdră thụ tinh hlăm đĭng (IVF). Kyua bi liê kdrăp mnơ̆ng mrâo mrang leh anăn ruah êpul mă bruă mâo klei thâo lu mơ̆ng mphŭn, truh ară anei, sang êa ngă leh tŭ jing 32.000 klei bliah, mdrao kơ giăm 54 êbâo phung dôk đih mdrao leh anăn ksiêm mkă kơ 851 êbâo gưl čô.

 Aê mdrao Võ Minh Thành brei thâo, čiăng ngă djŏ klei čiăng ksiêm mkă, mdrao mgŭn kơ mnuih ƀuôn sang, mbĭt hŏng pŏk mlar hnơ̆ng truh 700 jhưng điih mdrao, sang êa drao Sang hră gưl prŏng Y Dược Ƀuôn Ama Thuôt dlăng klei bi liê ksiêm hriăm kreh knhâo, mđĭ klei thâo phung aê mdrao jing sa hlăm bruă klam yuôm bhăn.

 “Hmei ba nao nanao phung aê mdrao nao ti sang êa drao prŏng, snag hră gưl prŏng hlăm ala čar leh anăn ala tač êngao, mtô bi hriăm hlăm wưng bhiâo, wưng sui. Jih klei anăn đruu kơ hdră mnêč ksiêm mkă leh anăn mdrao mgŭn mơ̆ng Sang êa drao mlih mrâo nanao, mđĭ klei thâo leh anăn dưi dưn klei thâo mơ̆ng dŭm ƀuôn prŏng hlăm kluôm ala.”

 Êngao kơ  Sang êa drao sang hră gưl prŏng Y Dược Ƀuôn Ama Thuôt, Dak Lak lŏ mâo sang êa drao prŏng Thiện Hạnh, sang êa drao êngao knŭk kna hnưm hĭn ti Lăn Dap Kngư. Bŏ 20 thŭn ngă bruă, Sang êa prŏng Thiện Hạnh đĭ ktar mơ̆ng hnơ̆ng 100 jhưng đih mdrao truh 660 jhưng đih mdrao, êbeh 300 čô aê mdrao mâo klei thâo thơ̆ng leh anăn nai prŏng, pŏk ngă lu hdră mnêč êlam, đru bi hrŏ klei mnuih ruă nao đih mdrao anôk kbưi, msĕ si bliah mâo klei ruă  brŭ hlăm dlô, bliah klang kkuê, kliăng jơ̆ng… Boh nik hlăm klei mdrao ƀă kkiêng anak, sang êa drao anei ngă leh tĭ jing lu klei bliah mă anak kơ phung mniê ba tian mâo klei ruă.

Hlue si aê mdrao Phạm Trọng Nhơn, K’iăng Khua sang êa drao prŏng Thiện Hạnh, sang êa drao ksiêm mkă leh anăn mdrao mgŭñ kơ hlăm brô  1.500 čô mnuih ruă grăp hruê hlăm 5 thŭn êgao, hŏng 550 čô mnuih đih mdrao. Klei anei brei ƀuh klei mđing uêñ mđĭ kyar bruă mdrao mgŭn êngao knŭk kna ti Dak Lak ba leh lu klei tŭ jăk.

 “Pô dlăng hlăm klei čiăng ksiêm mkă mơ̆ng mnuih ƀuôn sang leh anăn hlăm bŏ 20 thŭn Sang êa drao ngă leh bruă klam mơ̆ng anôk ksiêm mkă mdrao mgŭn ba klei mơak kơ mnuih ƀuôn sang, ênoh phung ruă hriê ksiêm mkă leh anăn mdrao klei ruă ti Thiện Hạnh ƀrư̆ hruê ƀrư̆ lu snăn bi mklă hdră tă mơ̆ng khua gĭt gai Sang êa drao dưi ngă leh klei mnuih ƀuôn sang čang hmăng hŏng klei jăk hĭn.”

Nay Phi La, Khua Knơ̆ng bruă mdrao mgŭn čar Dak Lak, brei thâo čar ară anei mâo 5 boh sang êa drao êngao knŭk kna leh anăn dŭm adŭ ksiêm mkă êngao knŭk kna hlăm kluôm kdriêk, wăl krah, ƀuôn prŏng ti čar. Êngao kơ bruă klam phŭn mơ̆ng bruă mdrao mgŭn knŭk kna, mdrao mgŭn êngao knŭk kna đru bi hrŏ klei ktrŏ kơ sang êa drao knŭk kna leh anăn ngă djŏ klei čiăng ksiêm mkă mdrao mgŭn mơ̆ng mnuih ƀuôn sang hŏng ênoh bi liê djŏ guôp.

 “Klei đĭ kyar mơ̆ng sang êa drao êngao knŭk kna ti alŭ  wăl ƀa leh kơ lu mnuih ruă klei ruah hlăm klei ksiêm mkă mdrao klei ruă. Bruă mdrao mgŭn ăt lŏ dơ̆ng mtrŭt mjhar ăt msĕ mơh đru kčĕ kơ Knơ̆ng bruă sang čư̆ êa čar, Phŭn bruă mdrao mgŭn mkăp hră brei ngă bruă. Hlăm bruă kriê dlăng brei mkŏ mjing klei bhiăn bi hgŭm kơ bruă knuă čiăng si bĕ ngă tơdah mâo klei čiăng duh kơ mnuih ruă amâodah tơdah mâo klei čiăng bi đru snăn amâo bi kah mbha plah wah knŭk kna hŏng êngao knŭk kna ôh”.

 Bruă mdrao mgŭn êngao knŭk kna ti Dak Lak hlăk dôk ƀrư̆ bi mklă bruă klam yuôm bhăn hlăm bruă mđĭ hnơ̆ng jăk kriê dlăng klei suaih pral kơ mnuih ƀuôn sang. Klei đĭ kyar mơ̆ng sang êa drao êngao knŭk kna amâo djŏ knŏng đru bi hrŏ kơ klei lu êgao hnơ̆ng kơ sang êa drao knŭk kna ôh ƀiădah lŏ ba klei ruah lu jơr, hmao ngă djŏ klei čiăng ksiêm mkă klei ruă. Mơ̆ng anăn đru mguôp yuôm bhăn hlăm klei đĭ kyar mbĭt bruă mdrao mgŭn Dak Lak./.